SUPERBALITA CEBU

‘Gibuwagan sa uyab’ nag drug courier

NADAKPAN: Mao kini ang 1.1 kilo sa gituohang shabu nga nasakmit gikan sa Arniel Estor, 34, nga gi-bust niadtong Sabado sa gabii. Si Estor niangkon nga usa siya ka drug courier. (Benjie B. Talisic)

DAW nahugno ang iyang kaugalingon human siya gibuwagan sa iyang hinigugma hinungdan nga nisulod siya sa pagka drug courrier dihang giaghat sa iyang amigo nga siya binlan.

Mao kini ang asoy ni Arniel Estor, 34, kinsa nasikop sa buy-bust sa mga sakop sa Labangon Police nga gipangulohan ni P/Maj. Henrix Bancoleta, hepe niadtong Sabado sa gabii, Oktubre 12.

Si Estor ilang gipalitan og usa ka bulto sa shabu gamit ang pulis nga pusuer buyer.

Matod pa ni Bancoleta nga halos usa ka buwan ang ilang pag-monitor kang Estor.

Ilang nasakmit ang 1.1 kilo nga shabu nga mobalor og P7.4 milyones.

Gihulagway usab ni Bancoleta nga high value target si Estor tungod sa gidaghanon sa drugs nga ilang nasakmit.

Si Estor, traysikad drayber, niasoy sa Superbalita Cebu nga siya nasagmuyo human buwagi sa kapuyo buwan na ang milabay hinungdan nga nag-drug courier siya.

Matud pa ni Estor nga siya na lang usa human biyai sa iyang kapuyo hinungdan na nisulod siya sa pagka drug courrier.

Dinhi niya nakita nga mas dako ang iyang kitaon itandi sa magsikad.

Sa P5,000 nga iyang bahin kada deliver, lahi ra ang iyang kita kaniadto.

Siya nangangkon nga una kadtong higayon sa iyang paghagbong og illegal drugs.

Apan matod ni Bancoleta nga di lang kay ka usa ra nabinlan si Estor og shabu sanglit nga halos usa ka buwan na ang ilang pag monitor.

Sa laing buy-bust operation sa San Nicolas Police nga gipangulohan ni P/Maj. Kenneth Paul Albotra, hepe, tulo ka mga tawo ilang nasikop.

Mga nadakpan mao sila si Ricjun Bacani, alyas Pacjun, target sa buy-bust, ug mga kauban nga sila si Jaggy Pangi ug Arniel Cuyos, mga lumolupyo sa Baranangay Suba, Siyudad sa Sugbo.

Nasakmit sa mga pulis ang gibana-banang 75 gramos nga shabu sa ilang possession nga balor og P500,000.

Matod pa ni Albotra nga si Bacani makonsidera gihapon nga HVT.

Gibana-bana nga 100 gramos nga shabu ang nasakmit gikan sa tulo ka laing gikatahapang mga drug pusher sa managlahing mga operasyon sa kapulisan.

Si Elemar Jose, 32, taga Sitio Silangan 1, Barangay Tinago, ning siyudad nga gihimo sa Waterfront police.

Nasakmit gikan kang Jose ang kapin sa singko gramos nga shabu gikan sa iyang possession.

Gihulagway sa pulis si Jose ang usa sa mga hulganan og drugas sa Sitio Silangan.

Samtang laing duha pa ang nadakpan sa buy-bust sa San Nicolas Police sa Lunes sa kaadlawon.

Si Reynaldo Daan, 30, alyas Nicole, taga T. Cavan, Barangay Pasil, target, ug sinaligan niini nga si Cyril Cartagenas dungan nga nasikop.

Nasakmit gikan kanila ang 95 gramos nga shabu nga gibana-banang mobalor og P700,000.

Talisay City

Sa Dakbayan sa Talisay, pulos mga dayo ang siyam nga nadakpan sa buy-bust Drug Enforcement Unit sa Talisay City Police Station niadtong Sabado sa gabii, Oktubre 19, sa Sitio Mananga 2, Barangay Tabunok,dakbayan sa Talisay.

Si P/Maj. Gerard Ace Pelare hepe sa Talisay City Police Station, niingon nga ilang nasikop ang babayeng target sa ilang operation ug nasakmit ang P200,000 nga balor sa illegal drugs.

Giila ni Pelare ang nadakpan nga sila si Grethel Mercado, alyas Madam Grethel, 29, lumolupyo sa Sityo Mananga 2 Barangay Tabunok.

Samtang ang laing walo ka mga nadakpan giila nga sila Joel Gabi, 40;Dax Mosqueda,36; Cleo Sellona, 27,pulos molopyo sa lungsod sa Minglanilla; Alexander Mirasol 49, lumolupyo sa Poblacion 1, dakbayan sa Carcar; Alfred Macalua 19,Michael Alindajao 31; Victor Basaslo, 35, pulos taga Barangay Lawaan 2, Dakbayan sa Talisay ug Balmer Linao, 40, taga Barangay South Poblacion, Dakbayan sa Naga.

Ang walo naabtan sa lugar nga mopalit samtang ang uban nasakpan nga nanggamit og shabu.

Dugang pa ni Pelare nga si Mercado taudtaud nang namonitor sa barangay sa iyang ilegal nga kalihukan nga makonsidera usab nga high value target. (dugang taho ni FMD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph