HUGOT nga monitoring ang ipatuman karon sa kapitolyo bisan paman sa gastohanan sa gasolina sa service vehicles sa probinsya.
Kini pinaagi sa gilaraw nga paggamit na og fleet cards.
Inay magsalig sa depot sa probinsya diin kinahanglan nga mobyahe pa padulong sa Sugbo aron magpagasolina, fleet card na ang gamiton kon diin makapagasolina na ang mga drayber sa mas duol nga gasolinahan.
Pinaagi niini, matod ni Gobernador Gwendolyn Garcia nga makadaginot na ug giingong mas convenient usab kini alang sa mga anaa sa layo nga bahin sa probinsya.
Magamit ang fleet cards sa tibuok nasud ug ma-monitor usab sa kapitolyo ang kunsumo pinaagi sa website sa kompanya ug makompara niini kun unsa na kalayo ang nabyahe sa drayber gamit ang odometer sa sakyanan.
Sa kasamtangang kuhaanan karon sa service vehicles ug lana base sa records sa PGSO gibana-bana nga di mo menos 23,553 litros sa lana sulod sa usa ka buwan ang magamit sa mga sakyanan sa probinsya.
Gibutyag ni Bernard Calderon pangulo sa Provincial General Services Office (PGSO) nga tungod niini may posibilidad nga matangtang na usab ang unom ka mga tawo nga anaa nag maintain sa depot.
Usa kanila ang regular ug lima ang gi-outsource lang sa probinsya.
Matag buwan mOhatag ug billing ang mapilian ug modaog nga fuel company sa bidding.
Gilaraw nga ipatuman kini lukop probinsya sa sugbo sa sunod tuig.
Hinuon, hisgutan pa atol sa pagbukas sa bidding ang mga regulasyon ug internal monitoring system. (ANV)