SUPERBALITA CEBU

BPO manager nagpatabang ni Labella ma-clear sa pulis

USA ka manager sa business process outsourcing (BPO) nagpatabang kang Mayor Edgardo Labella para malimpyo ang iyang ngalan sa kapulisan human nahulga ang iyang seguridad.

Si Rodolfo Ugang Jr., anak ni Atty. Rodolfo Sr., kinsa usa ka graduate sa abogasiya, nidangop kang Labella pinaagi ni City Attorney Rey Gealon nga iyang classmate sa kolehiyo para di na siya ipaubos sa surveillance sa kapulisan.

Si Ugang Jr., nagpuyo sa usa ka unit sa four-unit apartment kauban ang iyang pamilya sa lungsod sa Liloan.

Wa siya mahibawo nga ang nagpuyo diay sa pikas unit mao ang tipik sa grupo nga nitulis sa J Centre Mall sa Mandaue City niadtong Sabado, Oktubre 19.

Natingala si Ugang niadtong Dominggo nga adunay daghang mga pulis nga niadto sa ilang apartment aron moronda sa apartment nga naa sa iyang tupad.

Giapil sa mga pulis sa Liloan og tan-aw ang iyang sakyanan.

“Hibong mi nganong naay daghang pulis. Unya ang ako na ang sakyanan maoy gilili. Hibong na man ko nga ilang pugson og abli mao to niduol ko ug niingon ko “Sir, Sir” akoa na ug nitubag ang pulis, kinsa man ka? Ako sang gitubag nagpuyo ko diha sa pikas, SIr. Human gihawa nako ang sakyanan kay kuyawan ko, mao nangayo kog tabang ni Mayor para dili nami ma under surveillance,” saysay ni Ugang.

Nahadlok siya nga gilista na sa pulis ang plate number sa iyang sakyanan.

Giingnan siya nga panid-an ang iyang mga lihok sulod sa tulo ka buwan.

Gipadayag niya nga mga duha na ka buwan nga nipuyo sa apartment ang mga tulisan nga wa siya makaila. Iyang gihulagway nga di makig-estorya sa mga tawo sa palibot ug kon ilang ikasugat, moduko.

Gitawgan

Si Labella nitawag na kang Police Colonel Jonathan Abella, director sa Mandaue City Police Office, para ipahibawo ang kaso ni Ugang.

Ang mayor nitahas sa iyang staff ug gipaubanan si Ugang ngadto sa MCPO para iasoy ang nahitabo kaniya para dili maduhig ang iyang ngalan.

Kapin na sa tuig sila nagpuyo sa maong apartment ug ang kaliwat sa iyang asawa naa ra usab nagpuyo duol sa ilang gipuy-an.

Ang nipuyo sa apartment mao sila si DC Glen Gilberto Tairos, 47, gitumbok nga maoy leader sa tulis niadtong Sabado ug mga kauban.

Si Tairos usa sa upat nga napatay sa hot pursuit operation sa kapulisan.

Didto usab sa Liloan gibiyaan sa upat nga giila lang sa mga alyas nga Ryan, Mark, Ranger ug Tony Boy, ang usa sa duha ka mga sakyanan nga gigamit nga getaway vehicle sa mga tulisan.

Ang upat maoy gitumbok nga nidala sa mga alahas nga ilang tinulisan sa tulo ka mga jewelry shop sulod sa mall.

Wa na sila makaabot sa Polambato Port kay nakabantay nga nadakpan na ang ilang mga kauban.

Nibalik sa agi ang upat ug nihapit pa sa Bogo City proper una pa niadto sa Liloan ug gibilin ang sakyanan.

Si Police Major Danilo Colipano, hepe sa Liloan police station, nitug-an nga si Tairos ang responsabli sa pagtulis sa Palawan Pawnshop sa Liloan niadtong Enero ning tuiga.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph