UNOM ka mga tawo ang nasikop human naatlan sa kapulisan nga ilegal nga nag refill og butane sa usa ka balay sa sitio Lawis, Barangay Maghaway, Dakbayan sa Talisay, Lunes sa hapon, Oktubre 21.
Ang mga suspek nga magparyente lang gipang-ila sa kapulisan nga sila si Elmer Rulona, Alfred Padayao, Loi Padigos, Junifer Gadiano, Jensen Rita Barliso ug Cecilio Padayao, pulos hingkod ang panuigon, nanagpuyo ra sa Barangay Maghaway.
Matod ni Police Major Gerard Ace Pelare nga ang operasyon natunhay tungod sa tabang sa komunidad, pinaagi sa pagpadangat og impormasyon kalabot sa ilegal nga negusyo.
Apan padayon pa nga nihimo sa dugang pakisusi ang Talisay Police sa tag-iya sa ilegal nga refilanan sa butane human tak-om ang mga suspek kinsa ang tag-iya.
Ang pag- refill og butane gidili sa balaud, apil na ang pagbiyahe niini.
Kinsa kadtong masakpan pasakaan og kaso sa Department of Energy pinasubay sa balaud.
Mas gihingusgan kini sa Dakbayan sa Talisay human nga adunay sunog ug kusog nga explosion sa miaging buwan tungod sa ilegal refilling station sa butane sa syudad.
Nasakmit sa kapulisan ang walo ka dagko nga mga liquified petroleum gas (LPG) tank, upat ka improvised refilling machines, improvised cooling device, ug usa ka sako sa butane canisters.
Nakuha usab ang duha ka hand bag nga puno sa butane canisters ug laing 16 ka mga sako nga puno sa mga refilanan pa nga canisters.
Gitataw ni Pelare nga pagpakita usab kini nga di lang sila focus sa pagpanakop sa mga tawo nga nalambigit sa ginading drugas kundi lakip na ang uban pa nga ilegal nga mga binuhatan ug negusyo.