NANAMBO ang talagsaon kong pahiyom samtang naghunahuna sa ika-25 nga sumad sa pagkahimugso ning labing himalitan nga tabloid nga Binisaya, dili lang dinhi sa siyudad ug lalawigan sa Sugbo, apan lakip usab sa tibuok Kabisay-an kansang mga lumolupyo naglitok sa pinulongang Sugbuanon, ang SUPERBALITA CEBU.
Porbida, mikilab ra man ang panahon, ang katuigang nanglabay! Sa hilom, sa tumang kamapagarbuhon nakatuaw ako sa akong kaugalingon, “Salamat, Superbalita Cebu!”
Kinsa bay di makapasalamat sa SUPERBALITA CEBU? Nga kining maong tabloid nga Binisaya mao man ang una ug nag-unang tabloid nga mogula kada adlaw, nga morag “hot cake” sa kakusog ang halin. Sa iyang mga panid nakabaton og luna ang tanan kong obrang sugilanon nga gitampo isip usa ka magsusulat.
Sa tinud-anay lang, sa way paghikap sa akong kaugalinngong balhibo, nailhan sa Kabisay-an ug Mindanao ang akong “byline,” ang akong ngalan kay gi-reprint man sa Superbalita Davao ang akong mga sugilanon nga napatik na sa Superbalita Cebu. Nagpasalamat sab ko dihang gisangunan ko sa editor-in-chief ning tabloid sa pagpadagan sa seryeng prosa nga “FROM JUNQUERA WITH LOVE,” nga puno sa gugmahanong esena, panglimbasog sa kinabuhi, ug ang makapainit sa kaugatan nga romansa. Lalim bay, milanat kini og upat ka tuig!
Hinuon, dili lang ako ang angay nga magpasalamat sa SUPERBALITA CEBU atol sa iyang ika-25 nga sumad sa iyang pagkatukod. Lakip na ang mga kauban kong mga magsusulat nga tigtampo ning maong mantalaan, nga hangtod karon padayong mibubo sa ilang mga tampo alang sa kalampusan sa SUPERBALITA CEBU.
Ang SUPERBALITA CEBU dako kaayog gikatabang kanako. Mas nabaid pa gayud ang akong alamag ug dagang sa natad sa panulat. Nadasig ako ug nahimong inspirasyon ang mga kolumnista sa SUPERBALITA CEBU nga mga kompositor sab og awit nga Binisaya. Nahimo silang mga composer ug lyricist sa natad sa musika ug nakabaton og pangalan sa Cebu Pop Music Festival. Sila mao si Troy Ciar/AC Martin, Erwin Lirazan, Insoy Niñal. Mao nga misulay kog tagik og kantang Binisaya. Gisalmot kini nako sa ika-40 nga Cebu Pop Music Festival. Kini ang una kong pamasin-basin pagsalmot sa natad sa musika. Ako ang “composer” ug “lyricist” ning akong “entry.”
Taliwala sa nagbaha nga mga salmot (nga matod pa ni Ma’am Gloria Villarojo, mikabat og 200 ka mga “entry”) napili ang akong “entry” nga usa sa “12 finalists” nga magtigi sa “grand finals” karong umaabot Enero 17, 2020. Ang tinagik kong awit nag-ulohan og “PAILOB LANG.”
Nagpasalamat sab kog dako sa Ginuo ning laing anib sa akong karera nga miabot sa akong kinabuhi, isip “composer” ug “lyricist.” Nagpasalamt kog usab sa SUPERBALITA CEBU, nga sa akong pagka magtatampo niini, nakig-duhawit na ko sa iyang mga kolumnista nga mga “composer” sa natad sa musika. Ug kini nahiatol gayud sa ika-25 nga anibersaryo sa SUPERBALITA CEBU.
MABUHI KA, SUPERBALITA CEBU! PADAYON SA PAGLANAT SA UMAABOT NGA KATUIGAN!