MASAKSIHAN dayon sugod karong alas 10:30 sa buntag ang engkuwentro sa labing mga inilog nga mao ang Los Angeles Lakers ug Los Angeles Clippers sa pagsugod sa 2019-20 season sa National Basketball Association (NBA) sa Staples Center.
Apan adunay ngil-ad nga balita alang sa mga Pinoy nga nagsunod sa liga – wala’y TV coverage ang Pilipinas sa mga duwa sa NBA ning panahuna.
Hangtod ning higayuna, wala pa gihapon masulbad ang kakulian kabahin sa broadcast rights sa Pilipinas sa pagpasalida sa mga duwa sa NBA.
Hinuon nangita og paagi ang NBA Philippines aron dili mahikawan ang mga Pinoy nga mahiligon sa basketball.
Gianunsyo sa NBA Philippines nga ipasalida nila ang uban nilang mga duwa sa premirong semana sa season pinaagi sa live stream sa Facebook ug Twitter nga libre.
Karong adlawa, isalida sa duha ka mga social media ang panagsangka sa Lakers ug Clippers, nga maoy usa sa labing gikaintapang mga duwa sa bag-ong season.
Ugma sa alas 7:30 sa buntag, isalida sab ang panagsangka sa Boston Celtics batok Philadelphia 76ers, nga parehong gikonsiderar nga lig-ong mga puwersa sa Eastern Conference.
Karong Biyernes, Oktubre 25, sa alas 8:00 sa buntag, isalida sab sa social media ang sangka sa Milwaukee Bucks batok Houston Rockets.
Sa kasamtangan, ang NBA padayon pa’ng nangita og katambayayong sa Philippine TV human ang kontrata sa Solar Entertainment sa pagpasalida sa mga duwa sa liga ni-expire niadtong pagtiklop sa Septiyembre.
Ang pay TV companies nga Sky ug Cignal, nga nagpasalida unta sa mga duwa sa NBA pinaagi sa broadcast rights nga ilang nakuha gikan sa Solar, nakahukom nga magtambayayong aron mao ang modala sa broadcast rights sa liga.
Apan wala na-finalize ang pagpakignegusasyon sa Sky ug Cignal ngadto sa NBA.
“We are excited to celebrate the start of the new season by streaming games on social media for the first time in the country,” asoy ni NBA Philippines managing director Carlo Singson nga napatik sa Spin.ph.
“The Philippines is one of the world’s leaders in social media penetration and usage with over 17 million followers of the league’s social media accounts, making it an ideal platform to livestream NBA content.”
Mahimo sab nga makatan-aw ang mga sumosunod sa liga pinaagi sa NBA League Pass apan aduna kini bayad.
Hangtod nga wala pa’y makakuha sa broadcast rights sa pagpasalida sa mga duwa sa NBA gikan sa Pilipinas, ang mga duwa sa liga padayong makita sa mga Pinoy sa social media lang una. (AP, ESL)