ANGAY gayod nga masaludohan ang mga miyembro sa Task Force Davao gumikan sa ilang hugot kaayo nga seguridad nga gipatuman pagsulod sa Davao City.
Tulo ka mga entry-points ang Davao City nga gitimon sa TF-Davao, ang sa Calinan mao ang sa Barangay Lacson, sa Bunawan mao ang Barangay Licanan ug sa Toril mao ang Barangay Sirawan.
Niadto pa dili gyod ma-zero ang awtoridad, sa usa ka bulan naa gayod mabingwit nga pusher. Nadala og mga ilegal nga drugas ug bisan mga ilegal nga butang sama sa hinagiban, armas ug eksplosibo.
Sama sa miaging adlaw, usa ka Aiveen Rey Lupo Alimpoos, 37-anyos, nagpuyo sa Kilometro 12 Sasa, ning siyudad ang nasikop dihang yano lamang niini nga gisud sa paper bag ang shabu nga dunay kantidad nga P1.1 Milyon.
Nailhan kini sa mga sundalo dihang giitsa nalang sa suspek ang paper bag sa pikas kalsada tungod iyang nakita nga hugot kaayo ang seguridad nga gihimo sa mga personahe sa TF-Davao.
Dakong tabang ang TF-Davao sa pagpatunhay sa kahapsay ug kalinaw ning siyudad, miabag sila sa kapulisan labi na sa pagsikop sa mga malapason sa balaud.
Angay nga saludohan ang TF-Davao ug bisan ang kapulisan sa Toril Police Station, sa Calinan PNP ug sa Bunawan PNP kay di gayod kalusot kanila ang mga dautang butang nga isulod sa Davao City. Kudos sa awtoridad!