TACURONG CITY -- Nailog sa mga awtoridad ang dakong plantasyon sa marijuana alas 2:00 sa hapon niadtong Lunes, Oktubre 21, sa probinsiya sa Sultan Kudarat.
Sa taho gikan sa Sultan Kudarat Police Provincial Office, nasayran nga gisulod sa kapulisan, military, ug mga sakop sa Philippine Drug Enforcement Agency (PDEA)-Soccsksargen ang plantasyon sa marijuana sa bukiron nga bahin sa utlanan sa probinsiya sa Sultan Kudarat, South Cotabato, ug Davao del Sur.
Apan, wala na maabti ang nanag-iya sa dul-an usa ka ektarya nga plantasyon sa mga awtoridad.
Gibana-banaa nga mokantidad og singko milyones pesos ang naibot nga mga fully grown marijuana ug mga seedlings.
Mga dagkong punoan sa druga gipangsunog sa mga sundalo, pulis, ug PDEA-Soccsksargen samtang ang uban gidala alang sa ceremonial burning.
Dugay nang gipanid-an sa PDEA ang plantasyon sa marijuana nga gitumbok nga gipanag-iyahan sa mga miyembro sa New People's Army. (Edgar E. Fuerzas)