YANONG gisulod sa usa ka paper bag ang daghang pakite sa gituohang shabu nga dunay kantidad nga P1.1 milyon nga giagi sa Task Force Davao checkpoint sa Barangay Sirawan, Toril District, Davao City Lunes sa hapon, Oktubre 21.
Ang suspek giila ni Police Lieutenant Colonel Jed Clamor, hepe sa Toril Police Station, nga si Aiveen Rey Lupo Alimpoos, 37-anyos, nagpuyo sa Kilometro 12 Sasa, ning dakbayan.
Una niini, ang suspek nagmaneho sa motorsiklo diin sa iyang pag-agi sa checkpoint, iyang namatikdan nga hugot kaayo ang seguridad, hinungdan nga iyaha na lang giitsa ang paper bag sa pikas kalsada aron dili makita sa mga sundalo ang dala.
Natahap ang mga sundalo, hinungdan nga gihiling ang sulod sa paper bag ug didto nadiskubrehan nga dunay daghang pakite sa gituohang shabu.
Misulay pa og sibat ang suspek apan naapsan kini sa awtoridad, hinungdan nga gisikop ang suspek ug gihandus sa Toril police.
Ubay-ubay nga pakite sa shabu ang nakuha sa posisyon sa dinakpan nga dunay street value nga P1.1 milyon.
Depensa sa suspek nga igo lang kini gipadala kaniya ug ipahatag sa usa ka tawo sa Davao City nga wala nga hinginli sa kapulisan.
Niining kasamtangan, padayon ang pagsubay sa kapulisan kinsa ang nagpadala sa shabu ug kinsa ang posible nga hatdan niini, samtang ang nasikop nga suspek balhog sa selda sa Toril police. (Jeepy P. Compio)