Doktor mag-inject ug shabu

KASONG pagsupak sa Republic Act 9165, kun Comprehensive Dangerous Drug Act of 2002, ang atubangong kaso sa usa ka giingong doktor sa Southern Philippines Medical Center (SPMC) kinsa nasikop atol sa buy-bust operation sa Sta. Ana Police Station Martes sa kaadlawon, Oktubre 22.

Si Police Major Michael Uyanguren, hepe sa Sta. Ana Police Station, nag-ila sa suspetsado nga si Dr. John Perette Herrera, alyas Dr. John, 33-anyos, residente sa New Matina, Gravahan, Davao City.

Sumala ni Uyanguren nga sagad parokyano sa suspek mao ang mga miyembro sa LGBT nga nakaila niini sa social media.

Gidugang ni Uyanguren nga ginatunaw sa suspek ang shabu ug ginasulod sa syringe dayon i-inject ngadto sa iyang mga parokyano.

Una niini, ginapanubayan na sa kapulisan ang lihok sa suspek subay sa mga reklamo nga ilang nadawat.

Atol sa operasyon, nakuha sa posisyon sa dinakpan ang duha ka pakite sa gituohang shabu, usa ka disposable syringe nga dunay sulod nga nahimong liquid nga shabu, ug ang marked money.

Giingon sa kapulisan nga usa ka gikonsiderang high-value target si Dr. Herrera sanglit doktor kini nga nagserbisyo sa katawhan.

Ang kapulisan nanganti nga di gayod nila lung-an hangtud di madakpan ang mga tigpayuhot og druga sa siyudad sa Davao labi na nga bag-o karon ang hepe sa Davao City Police Office.

Ang suspek balhog sa selda sa Sta. Ana Police Station.