MGA duwa karon
4:30 pm- Blackwater batok Rain or Shine
6:45 pm- San Miguel batok NorthPort
Ikaharong sa parehong dekalidad nga pambato sa ilawom nga sila si Fil-German Christian Standhardinger ug Mo Tautuaa ang ilang kanhi team sa main game karong gabii sa Philippine Basketball Association (PBA) Governor’s Cup sa Cuneta Astrodome.
Sa labing unang higayon, si Standhardinger moduwa isip sakop sa NorthPort Batang Pier samtang si Tautuaa moduwa isip miyembro sa San Miguel Beermen sa ikaduhang higayon.
Si Standhardinger miangkon nga nakurat siya nga gi-trade siya sa Beermen apan dali ra kini niyang gidawat ug misaad nga buhaton niya ang tanan aron makatabang sa bag-o niyang puwersa.
Gipasabot ni Standhardinger nga naghinamhinam na unta siya gumikan kay nagtinguha ang Beermen nga makabaton sa ikaduha niining Grandslam title ning komperensiya.
Apan matod ni Standhardinger nga gilubong na niya sa kalimot ang maong kahinam ug andam na siyang motabang sa Batang Pier nga kasamtangang nagbitay sa may ilawom nga bahin dala ang 2-4 nga rekord.
“I wish I could’ve had a chance to win a grand slam. But it is what it is, and I think the players of San Miguel are great, and I only wish them the best,” matod ni Standhardinger sa PBA.PH.
Ang Beermen, nga adunay 5-1 nga rekord, nagtinguha nga makakuha nang daan og luna sa playoffs ning sangkaa ug paamagon ang ilang poruhan sa inilugay sa top two.
Ubos sa kampo sa Batang Pier, minus ra man tuod ang poruhan ni Standhardinger nga makabaton og titulo apan wala kini nakaapekto sa iyang determinasyon.
Si Standhardinger makig-abag sa pambato sa Batang Pier nga si Robert Bolick ning malisod nilang tahas.
“Sa amin, siguradong lalaro siya over 30 minutes a game,” matod ni NorthPort coach Pido Jarencio kabahin kang Standhardinger.
Gikaintapan sa panagsangka sa Beermen ug Batang Pier mao ang pagpakigparang ni Standhardinger sa Sugbuanong higante sa Beermen nga si JuneMar Fajardo.
Gipasabot ni Fajardo nga giandam na niya ang iyang kaugalingon sa panagparang nila ni Standhardinger.
Sa iyang bahin, si Tautuaa niduwa sulod sa 19 ka mga minutos sa kabing una niyang pagpakita og aksyon ubos sa kampo sa Beermen diin mingdaog sila batok sa Columbian Dyip, 113-107, niadtong Dominggo. Bisan dili tantong taas ang iyang oras sulod sa korte, si Tautuaa nakatampo og 10 puntos alang sa kadaugan.
Sa premirong duwa, magsangka ang Rain or Shine Elasto Painters ug Blackwater Elite.
Ang Elite adunay 2-4 nga rekord samtang ang Elasto Painters kasamtangang nagsalimoang dala ang 1-5 nga baraha. (ESL)