Kapitolyo mipakaon sa apektado sa clearing operation sa Oro

GITUBAG sa Kapitolyo ang kagutom sa mga apektado sa clearing operation sa dakbayan sa Cagayan de Oro pinaagi sa paghatag og pagkaon.

Kahinunduman nga mireklamo ang mga pamilya nga apektado sa clearing operation sa Gumamela St., Barangay Carmen nga sila gipasagdan lamang sa siyudad ug sa barangay.

Usa ka Thelma Alpuro ang nibutyag nga walay bisan usa nga niatiman kanila og pagkaon ug nakatulog pa sila daplin sa dalan human gipangguba ang ilang balay sa gipahigayon nga celaring operation.

Buot nila nga mahatagan sila og relokasyon sa siyudad.

“Silingan namo si Vice (Kikang Uy) (Cong) Klarex Uy ug (Kapitan) Lorna Uy wa gyod tao nga nianhi diri nga unsa man nakapanihapon na mo?” matud ni Alpuro.

Adunay 35 ka mga pamilya ang apektado sa road clearing niadtong adlaw’ng Lunes nga giingong nakatulog sila daplin sa dalan nga walay bisan ayuda nga gitunol ang barangay sa Carmen.

Dugang ni Alpuro nga nakahupay kanila nga makakaon ang tabang sa Kapitolyo probinsyal human sila gipahaturan ni Misamis Oriental Governor Bambi Emano og pagkaon.

“Ang nakapadala gyod namo sa hinabang namo gabii nga nakalung-ag mi ang tao ra gyud ni Bambi Emano,” matud niini.

Gikumpirmar kini ni Carlo Dugaduga ang tigpamaba sa Kapitolyo Probinsyal kinsa niingon nga wala nanginlabot si Emano apan dili niini maagwanta ang kaluoy nga gibati sa katawhan nga walay kaon.

Giingon sab niini nga nasabtan niya ang pagpatuman sa siyudad kay mando man kini ni Presidente Rodrigo Duterte ngadto sa Department of Interior and Local Government (DIlG) apan kinahanglan adunay abiso nga insakto ug adunay insaktong mabalhinan ang maapektuhan.

“Naluoy ko sa mga pamilya labi na gyud ang mga kabataan nga gipanggutom, giuhaw ug walay klarong gikatulgan nga basta na lang giguba ang ilang mga balay ug pagkahuman gibiyaan ra, wala man gani hatagi ug gamay nga ayuda ug bisan temporaryong katulgan palabay man lang sa gabii,” kini ang giingon ni Emano bisan paman nga anaa kini karon naka leave.

Matud ni Dugaduga nga nag-amot ang mga ulo sa departamento aron makaabot og hinabang aron makakaon ang apektadong pamilya.

Gipaabot sab niini nga samtang padayon ang pagpatuman sa CdeO sa road clearing operation unta ilang pangamdaman ang epekto niini sa katawhan sa siyudad ug mao kini ilang pangandaman.

Si City Administrator Teddy Sabugaa nihatag reaksyon niini ug miingon nga gipaadtoan lang ang mga apektado ug giinterbyu aron madaot ang siyudad.

Dugang niini nga mag-aplay kanila ang mga apektado aron mahatagan og kapuy-an.

Bukas ang mantalaan sa pahayag sa pamilyang Uy.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph