GIKUMPIRMAR ni Sangguniang Panlalawigan member Gerardo Sabal nga dili pa madali nga mapabalik ngadto sa nasod sa South Korea ang mga basura nga nadala dinhi sa lalawigan.
Gibutyag niini nga wala pay barko gikan sa south Korea nga mahidangat dinhi aron maoy mohakot pabalik sa mga basura nga gidala dinhi tuig 2018 nga walay igong dokumento.
Matud ni Sabal nga ang gihimo karon sa inter-agency task force nga gilangkoban sa kagamhanan sa probinsya sa Misamis Oriental, Bureau of Customs, National Bureau of Investigation (NBI) ug uban pa nga sakop niini ang nag-bagging pa niini.
“Naningkamot kita nga mapadali nga mabalik ug ang atong gihimo karon ang pag-bagging,” matud ni Sabal ug mipasabot nga gipanulod pa karon sa tonner bags ang mga basura.
Gibutyag niini nga nagkinahanglan og 5,000 ka mga tonner bags ang maong mga basura ug ang task force aduna lamang 1,000 ka mga tonner bags.
Gibutyag niini nga midonar si Misamis Oriental Governor Yevgeny “Bambi” Emano og 4,000 ka mga tonner bags aron dili na kini problemahon ug masulod na gyod ang 5,000 ka mga tonelada nga basura labina nga usa ka tonner bag eequivalent man kini sa usa ka tonelada nga basura.
“Mao kana karon nag approve nga modonar ang pagamhanan ni Governor Bambi og 4,000 tonner bags aron kanang mga basura masulod sa 40 footer container van ug sa sulod 40 ka tonner bags so kinahanglan pa og 200 ka container van para masulod kana nga mga basura,” matud ni Sabal.
Dugang niini nga mapasalamaton lamang sila sa suporta ug partisipasyon sa South Korea Government nga naningkamot makabalik kanila ilang mga basura apan nagpaabot lamang ang task force sa abiso niini.
“Wala pay fixed nga date kay ang atong gahulatan karon mintras tanto gahulat kita sa advice sa gobyerno nga ang barko gikan sa South Korea mao kana nagsugod pa kita og bagging kay kung moabot kining barko ug nay advice moabot next week or two weeks from now deretso na dayon nato nga ikarga,” matud ni Sabal ug miingon nga ang P10 milyon nga plite sa barko pagpabalik sa South Korea gisagot na sa ilang gobyerno.