EMOSYONAL ang rebelasyon sa usa ka datu atol sa presentasyon sa mga surenderrer nga New People’s Army (NPA) niadtong Oktubre 21 sa 88th Infantry Battalion headquarters sa Maramag, Bukidnon.
Matud ni Datu Balakbakan nga nalipay siya sa kaikag sa mga nahisakop ug misuporta sa NPA nga nakahukom nga mobalik sa sabakan sa gobyerno.
Butyag niini nga dili tiaw ang mga pagpanghulga nga gihimo sa NPA kaniya.
“Basin gusto ka datu mugawas imo dila sa liog?” pagsaysay ni Balakbakan.
“Bisag alas 10 sa gabie nanoktok sila, ila gusto akong mga sakop muapil sa rally bisag dili mi” matud niini.
Adlaw’ng Lunes, moabot ngadto sa unom ka regular nga NPA, 106 ka Milisyang Bayan (MB) o part-time NPA ang misurender sa Local Government sa San Fernando, Bukidnon uban sab ang laing 52 ka mga National Democratic Front ug local party branch sa Communist Party of the Philippines nga wala mipadayon sa ilang membership.
Misurender kini sila ngadto kang Mayor Levi Edma Sr. ug giduso ngadto sa 88th Infantry Battalion aron maproseso ang ilang benipisyo ng ubos sa programang Eclip nga programa karon sa gobyerno.
“Duna tay ibudget nga P2M para panginabuhian. Magtanom mog kahoy para sa kinaiyahan para sa panginabuhian, magtanom tag mga prutas. Ang NPA walay ikatabang sa inyo, bisag inyong bugas ila pangayoon. Kamo magtanom sila (NPA) gaharvest sugot pamo?” matud ni Mayor Edma.
Si Mitoy Mansuduan, usa ka regular nga NPA nga lakip sa misurender nanawagan sa iyang mga kauban labina gyod sa iyang igsuon nga aminado kining usa ka lider sa walhong grupo nga monaog na og mosurender.
“Kibang panaog na dire, ilang pasalig nga suportahan atong amahan wala gyud nahitabo, hangtod ron gakasakit. Gobyerno ray makatabang nato, dile tinood nga pamatyon tag mussurender sa gobyerno” matud niini.
Gipasabot ni Brigadier General Edgardo De Leon, 403rd Brigade Commander nga dili angayan mahaylo ang katawhan sa pasalig sa walhong grupo.
“Protektado mo sa International Humanitarian Law, pero sinesekreto sa inyo yan ng NPA. Ngayon takot ng NPA na manakit sa inyo dahil alam nyo nang hindi kayo pwedeng saktan at idamay sa labanan. Sa araw na ito, napatunayan na mas epektibo ang local peace negotiation na ipinag-utos ng Pangulong Duterte,” butyag niini.