SUPERBALITA CAGAYAN DE ORO

50 ka balay naugdaw

CAGAYAN DE ORO. Gipasiritan sa mga bombero og tubig ang mga baga human sa sunog sa Barangay Nazareth ning siyudad sa Cagayan de Oro niadtong Lunes sa hapon aron pagsiguro nga dili na kini moulbo pagbalik. (Kris C. Sialana)

GATOSAN ang mga indibidwal ang nagpasilong karon sa gym sa barangay human nga gilamoy sa kalayo ang ilang mga balay niadtong Oktubre 21 sa 12-28th street, Upper Nazareth ning siyudad sa Cagayan de Oro.

Nagsumikad ang kalayo sa panimalay ni Nilda Gomez nga nilamoy sa kapin 50 ka mga balay ug P1.2 milyones ang natala nga damyos.

Sa pakighinabi kang Fire Inspector Sam Lawrence Velarde, gibutyag nga ilang gitutokan ang giingong tungod kay dunay naglapog ug nagluto nga gibiyaan.

“Mao ang information sa mga kasilinganan pero as investigator initially didto lang ta mag stick sa witnesses nato, kana isa pud namo nga gitan-aw ang paglapog since maoy ingon sa silingan,” matud ni Velarde.

Base sa mga silingan, naglung-ag ang mga menor de edad nga mao lamang ang nahabilin sa balay.

Gideklarang fire under control mga alas 5:02 sa hapon ug fire out mga alas 7:51 sa gabii.

Anaa sa mokabat 222 ka mga indibidwal ang nabiktima sa maong sunog diin anaa usab sa 43 ka mga balay ang naugdaw gyud samtang upat ang partially damage.

Nakaangkon usab og samad sa tiil si Rodrigo Mahinay human nitabang pagpanghakot sa mga bata nga nabiyaan na sa mga inahan ug na-igo sa refrigerator nga dunay mga botelya nga nakapaingon sa iyang tiil.

Gitunolan na sa mga nag-unang panginahanglanon ang mga biktima.

Nag-andam usab og 200 ka packed meal gawas sa laing pagkaon ang kagamhanan sa maong barangay alang sa mga biktima.

Padayon nga nanawagan ang mga biktima nga matunolan og mga tabang sama sa sapot, habol, banig, mga sabon, ug uban pa.

Nagpahimangno usab kanunay ang Bureau of Fire Protection nga magbinantayon aron dili mabiktima niini nga kalamidad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph