GIAWHAG sa Inter Agency Council Against Trafficking (IACAT) sa Mactan Cebu International Airport (MCIA) ang publiko sa paglikay sa pakigsabot sa di awtorisadong mga recruitment agency bugti sa trabaho sa gawas sa nasod aron kalikayan nga mabiktima sa illegal recruitment.
Kini human nga sa Oktubre, moabot sa 35 na ka mga tawo ang napugngan sa MCIA pinaagi sa Bureau of Immigration (BI) nga makalarga gawas sa nasod alang unta sa pagpanarbaho.
Ang maong gidaghanon sa mga tawo gi-turnover sa ilang buhatan sa BI ug gipapauli na sa ilang tagsa-tagsa ka mga dapit.
Ang uban nga di ganahan mopauli sa ilang pinuy-anan kay way ikapleti ilang gitugyan sa Dept of Social Welfare and Development (DSWD).
Matod ni Ligaya Abadesco sa IACAT-MCIA nga ang mga napugngan sa paglarga pulos way gikapakitang mga papeles ug dokumento dihang gisita sa BI sama sa pagpatuo nga mga turista sila alang sa gawas sa nasod.
Sagad sa mga napugngan sa paglarga gikan sa nagkadaiyang suok sa nasod nga moagi unta sa MCIA sama sa Sugbo, Bohol, Leyte,Olangapo, ug uban pa.
Middles East ug Macau ang sagad sa padulngan unta.
Bugtong ang ahensya nga accredited sa Philippine Overseas Employment Adminsitration (POEA) lang ang angay nga duolon sa ganahan manarbaho sa gawas sa nasod, sumala pa ni Abadesco.
“Sa pagkakaron, ang tawag ana nila deferred departure passenger. Gi-defer lang ila pagbiyahe dili jud na authorized og sa online labi na kasagaran ila ka deal first name lang, nickname ang gamiton sa ila ka transaction,” matod ni Abadesco.
Kasagaran sa modus karon sa mga recruitment agency mao ang pag transact sa online sanglit wa na silay bayran sa POEA.
Mangiyawat usab ang uban sanglit mahaylo sa libre o gamay nga bayranan.
“Mailad gyud sila og nakalarga kay wala man ni silay overseas employment contract mao siyempre ilegal ila pag-adto sa gawas, undocumented. Dako ang possibility maabusohan sa amo kay dili man sila registered as OFW,” matod ni Abadesco. (GCM)