ANG Cebu City Legal Office mi-rekomenda pagpasirado sa mga pribadong menteryo o sam-ang atbang sa Pardo Public Cemetery gumikan sa kakuwang sa mga dokumento pag-operate sa maong sam-ang.
Si Atty. Jared Limquiaco, pangulo sa business permit section sa City Hall, mibutyag nga ilang nadiskubrehan nga walay bisan unsa nga permiso o dokumento gikan sa siyudad nga nagtugot pag-operate ug wala na sab nila masubay kon kinsa ang tag-iya sa maong lubnganan.
Gumikan niini, si City Attorney Rey Gealon ni-recommend ngadto ni Mayor Edgardo Labella pagsira niini apan uban sa pagsubay sa hustong proseso sama sa paghatag og notisya sa dili pa kini hingpit tak-opan.
“It appears that private cemetery in barangay Pardo is illegally established for failure to secure the necessary permits for its operation,” pasabot ni Gealon. “Clearly, a closure order is in order for establishment who fail to continue to secure the necessary permits.”
Ang City Government, pinaagi sa permit section, nakadawat og mga reklamo sa padayon nga pag-operate sa pribadong sam-ang nga walay pagtugot sa gobyerno. (PAC)