BISA’G nagpadayon sa pag-kunhod ang supply sa tubig sa Metropolitan Cebu Water District (MCWD), nagsige gihapon kini og rasyon sa tubig ngadto sa mga dapit nga naapektohan og maayo gamit ang mga bag-ong water trucks.
Ang MCWD, sa nahibaw-an, adunay upat ka mga bag-ong water trucks nga ilahang napalit isip pagpangandam sa panahon sa ting-init sunod tuig.
Apan tungod sa El Niño phenomenon nga nasinati sa nilabay nga tuig ug karon tuiga, nagamit gilayon kini.
Usa sa upat ka mga water trucks nga aduna’y kapasidad nga five cubic meters ang misuplay og tubig sa Barangay Carreta niadtong Agusto.
Nasayran nga anaa sa 20,000 cubic meters ang pagkunhod sa daily production sa MCWD tungod sa saltwater intrusion. Lakip sa naapektuhan ang mga atabay sa private supplier sa lungsod sa Consolacion.
Sa pagkakaron anaa na sa unom ka mga water trucks ang gipanag-iya sa MCWD diin may kapasidad nga 10 cubic meters.
Dungagan pa usab kini nila og laing duha.
Matod ni Engr. Edgar Ortega, MCWD Production and Distribution Department manager, nga ang mga trucks gigamit sa pagrasyon og tubig ngadto sa apektado nga dapit susama sa Sambag 1, Sambag 2, Sta. Cruz, ug Cogon Ramos.
Sa pagkakaron niabot na sa 30,000 cu.m. matag adlaw ang kakuwang sa tubig sa MCWD dakong sukwahi sa naandan nga 238,000 cu.m. matag adlaw.
Ang Jaclupan anaa sa 29,600 cu.m. ang daily production samtang anaa nalang sa 2,600 cu.m. ang Buhisan Dam. (HBL)