SA TUYO nga masolusyonan ang padayong suliran sa tubig sa dakbayan sa Lapu-Lapu, ang city government nakigpirma og kasabotan karon sa usa ka pribadong kompaniya nga nagbase sa Luzon alang sa pagtukod og duha ka desalination plant nga maka-supply og 60,000 cubic meters nga bulk water matag adlaw.
Ang naasoyng planta nga tukoron gikatakdang mo-proseso sa dagat ngadto sa tubig aron maoy hingpit nga ipang apod-apod sa mga konsumidor sa dakbayan.
Tukoron kini sa Brgy Marigondon ug Punta Engaño, duha ka barangay sa dakbayan nga padayong nakasinati og suliran sa tubig.
Sila si Lapu-Lapu City Mayor Junard “Ahong” Chan ug mga kadagkuan sa pribadong kompaniya nga CitiCore Summa (CS) Water pinangulohan sa ilang Chief Executive Officer (CEO) nga si Jose Antonio Soler ug ang presidente nga si Oliver Tan ang nagpinirmahay sa memorandum of agreement (MOA) sa buhatan ni Chan kagahapong adlawa Martes.
Ang dakbayan sa Lapu-Lapu maoy labing una nga local government unit (LGU) nga mihimo og lakang sa pagsulbad sa maong suliran nunot sa padayon karong kapakyas sa Metro Cebu Water District MCWD pagpangita og solusyon kabahin niini.
Pagpasabot ni Chan nga inay magsige na lang og reklamo sa serbisyo sa MCWD, mas maayo nga ang uban LGU maninguha na lang nga mohimo og kaugalingong paagi nga matabangan ang hingtungdang ahensya.
Ubos sa MOA gikatakdang magtukod ang CS Water og duha ka planta sud sa 18 ka buwan aron hingpit maka supply og tubig sa mga konsumidor sa dakbayan.
Posibleng sa buwan sa Disyembre ipahigayon ang groundbreaking, sumala pa ni Chan.
Isip royalty fee gikatakdang bahinan ang dakbayan sa CS Water ug P.50 matag cubic meter.
Gikatakda usab nga tagaan og prayoridad ang mga Oponganon nga maoy molangkob sa manpower sa duha ka planta sa CS Water.
“Well, ang reaction sa MCWD happy, lipay sila kay it’s a good use. Kahibalo ka nga gipangsaway sila karon kay wala silay gihimo sa maong problema. With this participation sa private sector happy sila, ang ila problema makuha kuhaan na so maayo ang mga LGU molihok sad kay di man na problema lang sa MCWD kundi problema usab sa matag syudad,” pagpasabot ni Chan.
Ang CEO sa CS Water nga si Soler, sa iyang bahin, mipadayag nga mokabat og P3.5 Bilyones ang gahin sa ilang kompaniya alang sa naasoyng proyekto.
Ila usab paninguhaon nga dili na kinahanglan maabot og 18 ka buwan ang pagtrabaho sa proyekto aron makasugod na sila sa pag supply og tubig sa dakbbayan.
Gikatakda pa hinuon silang makigtagbo sa mga kadagkuan sa MCWD alang unya sa ilang kasabotan kalabot sa presyo sa matag cubic meter nga ilang ihatag sa buhatan.
Ang dakbayan sa Lapu-Lapu nipadala na usab og letter of intent sa MCWD.
Pagpasabot ni Soler 60,000 cubic meters lang una ang ilang makayang mahatag sa dakbayan sanglit mag-agad pa sila sa mga gidak-on sa mga tubo o pipes sa MCWD nga nakamontar sa dakbayan.
Kun ugaling ma-upgrade na kini, hayan pwedi na usab sila maka supply ug 100,000 cubic meters.
“We’re also giving time for MCWD to build up the capacity, 60,00 insakto yan sa current pipes, as we deliver water we can now add additioonal pipelines that also be you know increase the volume of water. The nice thing about this is it’s modular, we can start at 25,000 then add additional modules to add 60,000 and in the future make it 100,000” pasabot ni Soler. (GCM)