ANG Local Water Utilities Administration (LWUA) nipuli na sa katungdanan sa lima ka board of directors (BOD) sa Metro Cebu Water District (MCWD) human giundang ang ilang serbisyo sukad niadtong Oktubre 15.
Si Acting Administrator Jeci Lapus sa LWUA, nipadala og suwat ngadto ni Joel Mari Yu, chairman sa BOD sa MCWD, nga nagkumpirmar sa notice of termination ni Mayor Edgardo Labella ngadto sa lima ka mga BOD nga iyang gipangulohan.
Iyang gikauban si Atty. Cecila Adlawan, Atty. Procopio Fernandez, Atty. Ralph Sevilla ug Augustus Pe Jr.
Si Lapus nagkanayon nga epektibo niadtong Oktubre 15, niepekto na ang notice of termination sa lima ka BOD hinungdan nga mohimo sila og temporaryo nga pagpuli sa mga nataktak nga opisyal sa MCWD.
“We deem it necessary to designate members of the interim Board of Directors for partial-takeover of the Metropolitan Cebu Water District due to the serious institutional crisis which may hamper the operation of the district to the prejudice of the public, ” matod sa suwat ni Lapus.
Ang LWUA nagkanayon nga nag-ung-ong pa sa ilang buhatan ang pag-review sa notice of termination nga giluwatan ni Labella subay sa Section 11 sa Presidential Decree 198.
Yu mi-resign
Gipahibawo sa MCWD nga niluwat na sa katungdanan si Yu walo ka adlaw human sa notice of termination ni Labella.
Una niini, si Yu niingon nga di siya manaog sa katungdanan ug iyang gihulagway nga ang gibuhat ni Labella illegal o invalid.
Magpadayon sila og trabaho subay sa mandato nga gihatag kanila ug makigtambayayong sa mga local government unit nga ilang gialagaran para pagpangita og solusyon sa problema sa tubig ug nanghinaot nga tahuron sa mayor ang autonomy ug kaugalingnan sa MCWD.
Gumikan sa pagdeklarar sa BOD sa MCWD nga bakante na ang posisyon isip chairman, ilang gitudlo isip acting chairman si Pe.
Wa matandog ang posisyon ni Sevilla isip vice chairman, kansang termino sa 2022 pa unta matapos uban ni Yu.
Samtang si Jose Eugenio Singson Jr., general manager sa MCWD, mokanaog na usab sa katungdanan sugod Nobiyembre 1 samtang mo-asumir isip acting GM si Stephen Yee.
Si Yee kasamtangang assistant GM para maoy moasikaso sa trabaho nga biyaan ni Singson.
Si Labella niputol sa serbisyo sa lima ka mga BOD kinsa mga appointee ni kanhi mayor Tomas Osmeña, gawas lang ni Fernandez, nga gitudlo ni Bise Mayor Michael Rama.