SUPERBALITA CEBU

Lider sa mga tulisan nailhan

NATUMBOK na sa kapulisan kinsa ang lider sa mga tulisan nga niigo sa tulo ka mga pawnshop ug money changer sa J Centre Mall sa Dakbayan sa Mandaue niadtong Sabado sa gabii, Oktubre 19, 2019.

Ang kapulisan nihangyo nga di una nganlan ang mao nga tawo samtang nakigtambayayong pa sila sa kapulisan sa Mindanao.

Ila hinuon kining gihulagway nga usa sa mga lider sa gikaintapang Kuratong Baleleng gang sa mga Parojinog.

Nasayran kini sa kapulisan human nila makuha ang mga CCTV footage diin nakita ang laing grupo sa mga tulisan nga wa pa nila madakpi.

Naa na sa kustodiya sa Cebu Police Provincial Office (CPPO) ang kuha sa CCTV camera sa terminal sa Bogo diin makita ang pag-abot sa tulo ka mga lalake nga adunay dala nga backpack. Gituohan nga mao kini ang gisudlan sa mga alahas nga tinulis.

Matod ni CPPO Director Police Colonel Roderick Mariano nga ang maong mga lalake sakay niadtong blue nga Ford hatchback nga kauban sa siyam nga nadakpan sa Bogo police station nianang pagka alas 11 sa gabii.

Naabot sila sa Bogo mga pasado alas 12 sa kaadlawon ug nihapit sa usa ka fastfood chain.

Dako ang posibilidad nga nasayod na sila nga nadakpan ang ilang mga kauban.

Pipila ka gutlo ang nakalabay, nisakay sila og balik sa sakyanan ug nangadto sa bus terminal.

Nisakay sila sa Ceres bus pabalik sa Siyudad sa Mandaue.

Naklaro pa ang panagway sa lider sa CCTV camera nga gimontar duol sa comfort room.

Pasado alas 3 sa kaadlawon sa Dominggo, Oktubre 22, naabot sila sa Mandaue City atubangan sa usa ka hotel sigun sa driver ug kondoktor sa bus.

Matod ni Mariano nga nakig-alayon na sila sa Mandaue City Police Office aron masubay pa ang mga kuha sa CCTV camera sa dapit aron mahibaw-an asa sila paingon.

Gipa enhance na nila kini sa PNP Anti Cyber Crime Group 7 aron matandi nila sa picture sa giilang leader sa robbery group nga nagbase sa Ozamis.

Aduna na silay pangalan sa pagkakaron nga giingong maoy nabilin sa Parojinog robbery group. “Ibinigay na natin sa Cyber Crime Group para ma enhance pa ang kuha ng CCTV camera kase magkamukha sila sa isang personality doon sa Ozamis,” matod ni Mariano.

Nganong gipatay?

“Kon nakasala man akong anak, wala na ba diay higayon nga mag-usab ang tawo? Wala lang unta patya. Gi priso lang unta.”

Mao ni ang sentimyento ni Godofreda Hisuler Abelidas, inahan ni Geomark Hisuler Tayros (sa sayo pa giila sa kapulisan nga si Kevin Plaza Andales), usa sa mga suspetsadong tulisan nga napatay sa kapulisan.

Mga suspek nga nadakpan mao sila si Roel Sumingit, Juvilyn Quirante, Arnel Cimafranca, Geomark Tayros ug Wilfredo Enguito nga mga taga Tangub City, Misamis Occidental; James Gomez nga taga Ozamiz City, Misamis Occidental; Jun Candelaria nga taga Naga, Bicol; Philip Faburada nga taga Tondo, Manila; ug Glen Tairos, unang gisuspetsahang lider sa grupong taga Talisay City, Cebu.

Upat nga napatay mao sila si Tayros, Enguito, Faburada, ug Tairos. Si Abelidas niabot sa Sugbo niadtong Martes sa buntag.

Matod niya nga nahibawo lang siya sa nahitabo sa iyang 25-anyos nga anak pinaagi sa Facebook post nga gipakita sa ilang mga kabanay niadtong Dominggo.

“Gi-post man gud sa Facebook nga gipaubo, dayon gibaklid, tapos, giagbayan og police. Wala koy kalibutan kay naninda ko. Pagkahibaw namo, nangita g’yod mi’g paagi nga ma-claim namo ni siya kay gi-post naman pod og utro, patay naman siya,” siya niingon.

Si Lorela Ladua, 47, ig-agaw og tagsa ni Glen Tairos, kinsa positibong niila sa lawas ni Tairos.

“Mga silingan ra poy nagpakita nga imo man ning ig-agaw. Pagtan aw namo nga mao g’yod na siya. Dominggo na mi sa udto nakahibalo,” siya niingon. “Niari g’yod mi diri kay among gisubay kon mao ba g’yod nga lawas. Siya g’yod. Dugay naman pod mi wala nakakita ana niya. Sa among barangay (Barangay Manga, Tangub City), dugay na ni siya wala kauli sobra five years na. Nakaagi ni siya og trabaho isip security guard sa Manila,” dugang ni Ladua.

Si Abelidas niingon nga wa siya makahinumdom nga ang iyang anak nalambigit og krimen.

“March karong tuig, ingon siya, ‘ma kuhai ko og barangay clearance kay magtrabaho ko didto sa Cagayan.’ Mag time keeper daw siya sa construction. Last na to namo nga pag estorya. Paghuman ato wala na siya nauli sa Misamis. Wala gani ko kahibaw nga naa diay siya diri sa Cebu. Ang akong pagtuo nga naa siya sa Cagayan,” asoy niya.

Samtang si Special Investigator 4 Leo Villarino, sa Commission on Human Rights 7, niingon nga mopadala silag team aron mopahigayon og imbestigasyon sa hitabo.

“Why are we investigating? It’s because these were four deaths. They were considered dead under the police custody. That’s what we are investigating. What’s the reason, gi assume nga naka restraint ni sila but still they were able to attempt to grab the firearms of the police," pasabot ni Villarino.

Apan si Mariano nanghimakak nga rubout ang nahitabo.

Napatay ang tulo sulod sa patrol car sa Bogo City police station human sila giingong nangilog og armas sa mga pulis.

Alang kang Mariano nga wa gituyo ang pagpatay sa tulo tungod kay midepensa lang ang mga pulis.

Labella natagbaw

Tulo ka mga mall ang gidayeg ni Mayor Edgardo Labella labot sa ilang pagpangandam sa seguridad kon ugaling adunay dautang mahitabo sa ilang area of responsibility sama sa tulis. Ang gipasabot ni Labella mao ang management sa SM Malls, Robinson Malls ug Ayala Center Cebu atol sa command conference sa mayor uban sa mga police station chief sa Cebu City Police Office. (AYB, WBS, PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph