Lonzon: Boljoon kaniadto ug karon

BASI sa report nga nadawat sa “Agila” nahimong pulitiko si Daday Derama Celis gumikan sa iyang igsoon nga si Wargong Derama.

Dili lang una nako hisgutan samtang wa pa nako makuha ang mga dokumento kon unsang matang sa negusyo nga gisudlan sa mga Derama.

Basi sa kasayuran nga nakuha sa “Agila“ si Daday gitagaan og kahigayunan ni Wargong nga mahimong mayor gikan sa 2010 hangtud sa 2013 ug dili 2007 nga anaa sa Google.

Tinuod ba? Tungod kay wa makapakita og performance si Daday nakahukom si Wargong nga ipuli ang pag-umangkon nga si Merlou Derama?

Si Merlou nga maoy napiling mayor sukad pa sa tuig 2013 ug hangtod karon naglingkod isip anaa sa katapusang termino nanghilam-os sab sa mga isyu sa korapsyon.

Ang report nga nadawat sa Agila may kamatuoran ba nga daghang isyu ang naglambigit ni Daday mao nga gipadaplin ni Wargong? Usa niini, ang findings sa Commission on Audit ( COA ) sa pagamit sa service vehicle sa mayor nga motubil og gasolina ug kurudo.

Daday, imong sakyanan kaniadto morag cellphone, dual sim? Ang report sa COA nagbutyag nga niadtong July 2011 ngadto sa June 2012 sobra ang paghabhab sa gas sa government vehicle ni Mayor Daday Derama Celis.

Ang nakapakugang sa COA kay diesel ang tubil sa sakyanan ni Daday. Apan ang record nga nakita sa COA motubil sab og gasolina.

Kon kini lang puntuha nga nakita sa COA ang atong komentaryuhan makaingon gyud ang katawhan nga kadako anang binoang. Si Daday naghupot karon ug katungdanan sa Kapitolyo sa Probinsya sa Sugbo, ubos sa liderato ni Gobernador Gwendolyn Garcia.

Si Gwen way lalis usa ka maayong lider. Ug ang mga pasangil batok kaniya tungod sa kahugaw sa pulitika.

Magpaabot si Daday alang sa usa ka motu proprio investigation sa Ombudsman tungod sa isyu nga nadiskobrihan sa COA.

Si Wargong nga maoy political kingpin sa Boljoon ug dugay nahimong mayor, sigon sa report sa Agila, maoy responsabli sa pagka datu sa mga Derama?

Kon tinuod nga nangadatu ang pamilyang Derama, kaluoy sa lungsod sa Boljoon hangtod karon nagpabilin mang 5th class municipality.

Paabuta ang sunod pa nga mga estorya sa lungsod sa Boljoon ubos sa pagdominar sa pamilyang Derama ug Celis. Email: efrenlonzon71@gmail.com Text: 09235562777

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph