LABING una sa tanan, ang editorial staff ug tagdumala sa Superbalita Cebu o nailang SuperB nagpasalamat sa Kahitas-an tungod sa makanunayong pag-agak ning mantalaan labi na sa panahon nga gihamok sa daghang pagsulay ug hagit sa iyang paglahutay labi na sa sayong bahin sa pagkahimugso niadtong 1994.
Dako ang atong pagsalamat sa amahan sa SuperB, ang bisyonaryong si Atty. Jesus “Sonny” Garcia Jr. kinsa kusganong ug pursigidong niduso sa mantalaang Bisaya taliwala sa pagsupak sa pipila nga nagpalibot.
Dako usab ang papel sa multi-award-winning editor ug Plaridel Awardee for Community Journalism nga si Atty. Pachico A. Seares, kanhi editor-in-chief sa SunStar Cebu, sa iyang paggiya sa mantalaan isip unang editor-in-chief sa Superbalita Cebu, uban sa kaabag nga si Anol Mongaya, kanhi managing editor.
Atol ning ika-25 nga anibersaryo, garbo ning mantalaan nga gidumala sa dunay lubas nga kasinatian sa pamahayag nga si Michelle P. So, editor-in-chief, ug Roger Vallena, news editor.
Gikan niadto ug hangtod sa kasaulogan karon sa iyang ika-25 ka uig, dili ikalalis nga nag-una ang Superbalita Cebu nga inadlaw-adlaw nga mantalaan base sa (1) gidaghanon sa mga bumabasa ug (2) kahalapad sa dapit nga iyang naabot nga dili lang dinhi sa Tungatungang Kabisay-an, lakip ngadto sa Rehiyon 8 o dapit sa Leyte.
Ug ning tanan, dako ang pagpasalamat sa atong mga suking bumabasa ug daghang advertisers.
Tabloid
Bastos o law-ay ba ang tabloid o mantalaan sa masa? Tinuod, batakang batasan sa masa ang mahiligon sa tsismis, seksi o bold, dili katuhoang istorya, krimen o sagad police stories, pulitika ug uban pa nga usahay dili madawat alang sa kalidad nga pamahayag nga gibarogan ug naila ang iyang inahang publikasyon nga SunStar Cebu.
Ang Superbalita Cebu naningkamot nga dili mabuwag sa gusto sa masa o dunay koneksiyon apan reponsable sa iyang pagtaho. Dunay limitasyon sa iyang mga pulong ug hulagway nga imantala. Labaw sa tanan, mokuha kanunay og habig sa mga batid alang sa sayantipiko nga pagpasabot sa usa ka hitabo o sitwasyon.
Bisan tabloid, ang bata pwede makabasa ning mantalaan o dili tagoan sa mga ginikanan tungod sa pagtamod sa estriktong limitasyon subay sa konserbatibong komunidad.
Gawas sa kalidad, matinud-anon ug patas nga taho, ang ubang unod nga mantalaan haom sa tilaw sa masa.
Natampo
Kanunay nga gibalikbalik sa mga pakigpulong ni Sir Sonny sa matag anibersaryo ning mantalaan nga ang Superbalita Cebu natawo tungod sa iyang pagmahal ug adbokasiya sa pagpanalipod ug pagpalambo sa linguwahe nga Sugbuanon o Bisayang pinulongan sa kinatubuk-an.
Ang Superbalita nahimong kabahin sa pagtuon ug pagsagop sa nauyonan sa Akademiyang Bisaya diin nakatutok sa spelling ug grammar. Samtang ang ubang pulong nga wala pa mauyoni sa Akademiya, kining mantalaan naghimo og stylebook nga Tamdanan nga gibasi sa iyang adlaw-adlaw nga kasinatian sa pulong.
Nagtuo ang editorial staff nga ang pinulongan dynamic o dunay kausaban o bisan sa pagsagop gikan sa ubang pinulongan. Giklaro sa Superbalita Cebu nga daling masabtan--kini ang matuod nga komunikasyon. Nahimong hawanan usab sa literatura diin makagawas sa mga sinuwat sa Bisayang magsusuwat.
Isip mantalaan, dako ang natampo sa Superbalita Cebu sa pagtaas sa ang-ang sa mga sinuwat nga Binisaya ug pagtahod sa mantalaang Bisaya. Nakadawat na kini og kapid-an nga pasidungog labi na sa ulahing pagpangharos sa Bisaya category sa 2019 atholic Mass Media Awards (Camma) sa Archdiocese sa Sugbo.
Tungod ning tanan, nahimong impluwensiyado ang Superbalita dili lang sa masa lakip sa hamiling hut-ong sa katilingban g adunahan.
Kausaban
Mapasigarbuhon namo nga ipaambit nga ang Superbalita Cebu wala makahadlok sa pagtumaw sa social media apan nakakita og opurtunidad sa bag-ong platforms busa misagop sa digital publishing.
Kini ang mas dakong hagit karon apan, ang Superbalita Cebu makaingon kita nga lig-on na ug pulido sa iyang ika-25 ka tuig nga kasinatian human malampusong nakaharong sa balod sa kinabuhi.