SUPERBALITA CEBU

5 konektado sa 'double your money' scheme sikop; mga biktima midangop sa CIDG

Aniay duha ka biktima sa "double your money" scheme nga midangop sa CIDG-Central Visayas aron ireklamo ang lima ka mga dinakpan nga konektado sa Phoenix EA Holding International Incorporated. (Photo by Arnold Bustamante)

NASIKOP sa entrapment operation sa mga sakop sa Criminal Investigation and Detection Group (CIDG)-Mandaue ang nagpadagan sa bag-ong investment scheme sa Metro Cebu human sila gireklamo sa nabiktima sa pagpangilad.

Nahitabo ang entrapment operation alas 10:10 Martes sa gabii, Oktubre 22, sulod sa usa ka coffee shop nga nahimutang sa North Reclamation Area sa maong dakbayan.

Ang mga nangadakpan mao silang Ailyn Hopre Matulac, 41, taga Green Meadows Subdivision, Barangay Tugbok, Davao City, kinsa gitudlo nga founder ug chief executive officer sa kompanyang Phoenix EA Holding International Incorporated; Arjon Gumban, 26, taga Poblacion M’lang, North Cotabato; Caesar Ian Acenas, 43, taga Xavier Estates, Upper Balulang, Cagayan de Oro City nga kanhi bise mayor sa maong dakbayan; Maria Esperanza Makinano, 34, taga Camp Alagar, Lapasan, Cagayan de Oro City; ug Adjetor Daya Jr., 35, taga Purok 6, Barangay Tugbok, siyudad sa Davao.

Matod ni Police Major Edwin Lacostales nga adunay mireklamo sa ilang buhatan labot sa investment scheme nga gihimo dinhi sa Metro Cebu sa grupo ni Matulac.

Ang modus sa grupo mao ang pag haylo sa mga tawo nga mo-invest bugti sa 30 percent nga tubo sulod sa 30 ka adlaw.

Giingon nga inig hatag sa kwarta, adunay ibaylo nga produkto nga pangpagwapa aron dili mahibaw-an nga investment scam.

Pasalig matod pa nila sa mo-invest nga ang kwarta ila kining i-invest usab sa Foreign Exchange.

Daghan matod pa kinig nahaylo sa dakbayan sa Davao ug Cagayan de Oro diin miabot na matod pag P400 million ang nasulod sa kompanya niini.

Ang pangalan sa kompanya nga gidala niini sa Mindanao mao ang Blitz Unlimited Incorporated, apan gipangkiha sila didto nga maoy hinungdan nga mibalhin sila dinhi sa Sugbo sa lain na nga pangalan nga mao ang Phoenix EA Holding International.

Mihimo dayon ang kapulisan og imbestigasyon ug surveillance ug nasuta nga tinuod ang reklamo sa usa ka tawo nga naka-bugbog og dakong kantidad sa maong kompanya.

Dali nga gisusi sa kapulisan sa Securities and Exchange Commission (SEC)-Central Visayas apan nasuta nga wala kini marehistro ug illegal ang pagpa-invest sa mga tawo niini.

Gihimo dayon ang entrapment operation sulod sa usa ka coffee shop dala ang boodle money ug sa dihang natunol, na nagpaila dayon ang mga operatiba nga mga sakop sa CIDG-Central Visayas.

“May mga surveillance kami prior to this. Last week pa namin to hinahabol, eh din nung gabi lang namin na tiempohan na nanduon na sila,” matod ni Police Major Edwin Lacostales.

Giingong niadto lang Abril ning kasamtangan nga tuig nagsugod ang kompanya ni Matulac.

Hugot matod pa nga gihimakak ni Caesar Ian Acenas nga apil siya sa nagpadayan sa investment scheme gani biktima usab siya niini tungod kay naka invest siyag dakong kantidad.

Apan matod ni Lacostales nga silang lima ang gika transact sa mga operatiba.

Mahimo hinuon nga gamiton nga state witness ang kanhi bise mayor sa siyudad sa Cagayan de Oro kung tinuod nga apil siya nga biktima sa maong scam.

Naabot usab sa CIDG ang usa ka 47-anyos nga overseas Filipino worker nga si alyas Oscar, kinsa naka invest og P1 million kang Matulac aron mo sang-at og reklamo batok sa Phoenix EA Holding International Incorporated.

Matod niya nga nadala siya sa pasalig nga mo doble ang iyang usa ka milyon ka pesos sulod sa 45 ka adlaw.

“Ang promise niya na tutubo yung ibibigay mong halaga sa isang daang porsiento so kung mayron kang isang milyon magiging dalawang milyon sa luob ng apat na put limang araw,” matod ni alyas Oscar.

Sukad siya mi invest niadtong buwan sa Mayo, wala pa siya mahatagi sa gisaad niining ginansya.

Naabot usab sa CIDG ang mga biktima sa lain-laing lugar sa Mindanao sa dihang nasayod nga nadakpan ang founder sa Blitz Unlimited apan gipasa na sila nagdto sa CIDG sa ilang lugar aron didto na sila pasakaan og kaso.

Giandam na ang kasong kalapasan sa Section 28 sa Republic Act 8789, kun Security and Exchange Commission Code, ug illegal possession of firearms human makuhaig armas ang body guard niu Matulac. (AYB)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph