Sugilanon: Ang teks ni Sonia

Sugilanon: Ang teks ni Sonia

MITUNOG ang selpon ni Selso. Iyang gikuot sa iyang bulsa ug giablihan.

“Ayaw na gyud og sakay sa motorsiklo sa akong bana! Makonsensiya ko kon unsay mahitabo nimo. Si Sonia ni!” mao ni nabasa ni Celso sa iyang selpon, teks nga nadawat niya. Bag-o lang siyang nakakanaog sa gisakyang habalhabal nga iya sa suod niyang higala nga si Novie. Wa siya papletiha pagkanaog niya sa merkado sa lungsod sa Amiraw. Magpatupi siya sa iyang suking barberiya ning sayong kahapunon.

Naglibog si Celso kon unsay gipasabot ni Sonia. Hinuon nakasabot siya nga way maayong relasyon ang magtiayong Novie-Sonia, tungod sa bisyo ni Novie. Apan gusto siyag katin-awan kay nag-iyawat unta siyag libreng plete sa habalhabal kon molugsong siya sa merkado o kaha ngadto ba sa buwangan. Kadagahan na siya makasakay sa habalhabal sa iyang higala. Di gyud siya papletihon. Panday si Celso ug kadaghan sab siya nakahatag og libreng serbisyo kang Novie sa gagmayng pandayunon sa balay niini.

“Unsay may gikahadlukan nimong mahitabo?” balos nga teks ni Celso kang Sonia.

“Drug user and pusher kanang akong bana. Kadaghan na siya gi-tokhang nga pa-surenderon. Wa gyud mo-surender kay nahadlok nga ipapatay sa tighatod niyag drugas,” teks ni Sonia.

“Paita gyud diay sa mo-entra anang bisyoha ug negusyoha! Way eskapatorya! Kon dili pulis ang makapatay, ang sindikato,” tuaw ni Celso sa hilom. Karon pa siya batia og kakulba sa risgo nga iyang nasudlan sa pagsakay sa habalhabal sa iyang higala nga si Novie.

“Salamat sa imong pahimangno,” tubag teks ni Celso. Misugod na siyag lakang padulong sa barberohan sa silangang habig sa merkado.

Samtang naglakaw gi-teksan niya si Sonia. “Mao diayng wa na ko kakita nimo nga mi-backride sa motorsiklo sa imong bana.”

“Makadawat na ko kon unsay mahitabo niya. Basta di lang mi maamong, iyang asawa ug mga anak,” balos nga teks ni Sonia.

Gipangilugan si Celso nga naghunahuna sa iyang higala kon may buy-bust operation nga himuon ang mga pulis ug si Novie mosukol. Nakapanakla siya. (KATAPUSAN)

Related Stories

No stories found.
SunStar Publishing Inc.
www.sunstar.com.ph