DEAR Noy Kulas,
Daghan ang nag-ingon nga basta gugma, way tawo nga lig-on.
Di ni akong problema kon di sa akong amiga nga tawgon lang og Renee, 29, kauban nako sa usa ka kompaniya nga di lang nako nganlan.
Kini siya single mother ug kadaghan na nakaagi og relationship nga puro failure. Naay tawo nga bisan unsaon, suod kaayo sa dimalas sa gugma. Gwapa unta ni siya ug utokan, pero kalas og utok basta gugma na ang hisgutan kay dali rang ma in love sa lalake nga manguyab niya.
Nisuway na siya og hikog kay desperada tungod sa iyang mga sad experience sa lovelife. Ako na siyang gitambagan nga di magsige og duol og lalake pero, madala gihapon sa atik. Kon ikaw ang pangutan-on, unsa may angay niyang buhaton aron di na siya mailad? Naa bay formula ani, Noy? Lalake man gyud ka, basin naay paagi nga unsaon paglikay ninyo.
Liz
Liz,
Usa ra ang sulbad ana. Palikaya siyang makigsuod og lalake kay kon padayon siyang mo-entertain, pinaagi sa pagbarkada,matintal ra gihapon siya sa pagpakigrelasyon. Will power ang iyang gikinahanglan aron kini mabuhat. Lisod ning buhaton kon siya ang matang sa babaye nga di mabuhi kon way hilagang lalake o way relasyon.
Hinuon, kining tanan has something to do sa iyang childhood tingali kay motuo ko nga kon unsa kita kaniadto sa bata, makita diha samtang magkahamtong na. Apan maputol man gud na kon determinado siyang makalikay sa lain na usab nga makapasakit sa iyang kasingkasing. Ug ang mas pait, kanang binlan na usab siyag anak unya di mosuporta ang amahan kay moingon og DNA (di na ako) nga maoy sagad diskarte kon ang babaye mabdos na.
Busa, kon gusto siyang makalikay og mga kasakit, iyang palay-an ang mga tentasyon. Mao ra na ang bugtong paagi kay dali ra ba diay siyang madala sa katam-is og dila sa ubang mga lalake nga pangatik ray tuyo kay gusto rang motilaw. Mahimo rang makig-amigo, apan palikayi niya ang pakigsuod kay bati gihapon ang padulngan.
Moabot ra ang lalake niya kana kon dunay gitagana ang Ginuo. Mas maayong iyang igahin ang panahon ngadto sa iyang anak nga segurado pang mo love niya bugti sa iyang gugma.
Noy Kulas