WALA to siyay formality. Walay “please see me in my office” nga istayl sa pag-imbitar. Abi gani nakog binuang ra to niya, kay siaw ra ba pud ni siya. Mao bitaw tingali nga nagkasuod mi kay parehas ming bugalbugalon.
Pagsud pa lang nako sa office, wa pa gani ko kapuwesto sa akong work station, mga alas singko kadto sa hapon kay panggabii man ming mga editor, dayon siyag ingon nako, “LPN (initials sa akong Lorenzo P. Niñal), ganahan ka mosuwat og kolum sa Superbalita?”
Kusog iyang pagkasulti ini. Sure ko nakadungog ang tanang tawo sa newsroom atong higayona. Wa ko kalihok, mikaging, naugbok sa gibarogan, apan wa nako gipaklaro akong gibati kay abi pa lang... you know, basta. Aron ingnon ba nga dili big deal nako tong butanga.
Apan ang tinuoray, labihang lukso-lukso sa akong kasingkasing sa kalipay. Laliman mo nang kolumnista na ko sa Superbalita? Kalami na man lang gyod nga isyagit og “Yes, of course, ganahan kaayo ko miss!”
Apan kay pa-cool man lagi ta, napugngan nako akong gibati ug kalma ko nga mitubag, “Ok ra kaayo miss. Kaya ra man tingali.”
Ang miss nga akong gihisgotan mao si Michelle P. So, o MPS. Bag-o pa lang siya nga gitudlo isip editor-in-chief sa Superbalita niadtong higayona, ug ang pagkuha niya nako isip kolumnista usa sa mga kabag-ohan nga iyang gihimo sa maong mantalaan.
Ako na lang pud nga ilakbit og istorya nga si MPS sab ang miinterbyu ug midawat nako isip reporter sa SunStar Cebu, diin nahimo kong editor, dayon kolumnista sa Opinion Section ug sa Weekend Magazine.
Sa mubo nga pagkasulti, dako ang papel ni MPS sa akong pagkamanuwatay.
Nakahinumdom ko ni MPS tungod kay gahapon gisaulog sa Superbalita ang ika-25 nga anibersaryo niini. Uban ni MPS, nakahinumdom usab ko sa mga unang isyu sa Superbalita niadtong tuig 1994 ngadto sa 1995.
Sa seminaryo pa ko aning mga tuiga, apan kahinumdom pa ko sa mag-inusa ra nga copy sa Superbalita matag adlaw nga ipasa-pasa namong mga parionon tungod sa mga hulagway sa mga hubo nga babaye sa front page ug sa entertainment section niini.
Kay ngano, abi kay seminarista di na mobatig kaibog?
Magkagutay-gutay intawon ang mantalaan, ug ang mga hulagway sa mga hubo nga babaye, ako ang makailog kanunay.
Baynte-singko ka tuig. Pagkadugay na nga panahon, apan mora lang og gahapon. Pila pay edad ni MPS kaniadto? Sa sunod namong kita ako siyang pangutan-on.
Ug kay natrabaho na man siya sa SunStar atong panahona, ako na lang sab siyang pangutan-on kon apil ba siya sa mga hubo nga babaye nga nagbansiwag sa Superbalita kaniadto.
Ug sure ko nga sa iyang kasipat, motubag ra pud siya sa pina-sexy nga tingog, “But of course LPN, apil ko ato.”