Barrita: Mandatory nga bakuna sa kabataan

GISAULOG karong adlawa sa tanang mga Rotary clubs sa tibuok kalibotan ang World Polio Day. Usa sa mga kampanya sa Rotary International ang hingpit nga pagwagtang sa makabakol ug usahay makamatay nga sakit nga poliomyelitis pinaagi sa pagbakuna o immunization sa kabataan.

Ang Pilipinas usa sa mga nag-unang beneficiaries sa libreng bakuna sa polio gikan sa Rotary International. Niadtong tuig 2000, gideklarar sa World Health Organization (WHO) nga polio-free na ang Pilipinas. Apan ning bag-o lang, dunay nadiskubrehan nga kaso sa polio sa Pilipinas.

Busa gihingusgan pagbalik ang pagbakuna sa kabataan batok sa polio kay ang kabataan mao ang labing vulnerable, mao ang labing daling takboyan niini. Ang bata nga matakboyan sa polio di na maulian ug mahimong mabakol sa tibuok niyang kinabuhi.

Ang pagbalik sa polio ug ang pagsaka sa mga kaso sa measles kun tipdas gibasol sa kahadlok sa mga ginikanan nga pabakunahan ang ilang mga anak tungod sa Dengvaxia, ang bakuna batok sa dengue. Ang bakuna batok sa polio napamatud-an na nga luwas.

Apan nahibawo ba kamo nga dunay balaod sa mandatory immunization sa tanang kabataan hangtod sa edad nga singko anyos? Mao kini ang Republic Act (RA) No. 10152, ang “Mandatory Infants and Children Health Immunization Act of 2011” nga giaprobahan niadtong Hunyo 21, 2011.

Ang tumong sa gobyerno mao nga kapanalipdan ang tanang kabataan gikan sa pagtakboy sa mga sakit ug balatian, niadtong gitawag nga “vaccine-preventable diseases.” Di na maghuwat nga takboyan ang usa ka bata sa sakit aron tambalan.

Ang pagbakuna alang sa mga vaccine-preventable diseases naglakip sa tuberculosis (TB); diphtheria, tetanus ug pertussis; poliomyelitis; measles kon tipdas; mumps kon bayuok; Rubella o German measles; Hepatitis-B; H. Influenza type B (HIB); ug sa ubang mga sakit nga imando sa Secretary of Health.

Libre ang mandatory basic immunization sa tanang hospital sa gobyerno ug mga health centers alang sa mga bata hangtod sa edad nga singko anyos. Ang pagbakuna magprotehir sa kabataan gikan sa gihisgotan nga mga balatian.

Ang mga health experts sa Department of Health ug WHO niingon nga ang polio mokatap pinaagi sa atong palibot, lakip na sa tubig ug pagkaon. Busa gikinahanglan nga limpyo ang palibot ug batasanon ang pagpanghugas sa kamot sa tubig ug sabon.

Likayan usab ang pagpataka sa pagpagawas sa hugaw sa tawo sa bisan asa lang. Adto gyud kini buhaton sa kasilyas. Kay kon ang langaw nga motugdon sa hugaw unya motugdon sab sa pagkaon, mahimong motakap ang maong balatian. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph