HAPPY 25th anniversary sa Superbalita. Pagkadali ra gyud nga modagan sa panahon no? Daw kagahapon pa lang nga nagsugod kining maong pamantalaan. Apan takulahaw nga 25 anyos naman diay. Nagsugod ako og suwat ning maong pamantalaan pipila lang ka buwan human kini nahimugso. Wala lang mahibaw-i nga milambo ug milipang kining maong pamantalaan nga nagserbisyo na sulod sa 25 ka tuig. Congratulations!
Tulis sa J Mall
Nagbiling tanghaga ang nahitabong tulis sa upat ka mga establisemento nga nag-abang sulod sa J Centre Mall sa AS Fortuna St., Mandaue City niadtong Sabado sa gabii. Mga pangutana nga nagkinahanglan og insaktong tubag labi na gyud sa kantidad sa mga alahas ug cash nga nadagit sa mga tulisan.
Ang mga imbestigador mibutyag nga mokabat ngadto sa P136 milyones ang kantidad sa mga alahas ug cash ang nakuha sa mga tulisan. Ang Ginros Gem and Jewelry mideklarar nga nakuhaan sila og P20 million nga kantidad sa mga alahas; Oro China Wedding and Engagement Rings, P10 million, M. Lhuillier, P50 million, Jay-Ann Jewelry, P50 million. Samtang ang I- change money changer, mideklarar og P6 million cash.
Tinud-anay kaha kining maong mga deklarasyon? Wala kaha nila ni padak-i aron maka-claim usab sila og dako sa insurance?
Makaduda man god nga kining ubang mga jewelry shop dili man kaayo high-end nga mo-display. Kanang mga wedding rings, pila ra man ang i-display ana kay orderon man na.
Sa kaso sa money changer, makadaghan man na sila magdeposito kada adlaw. Kuhaon man nang ilang kuwarta sa taga bangko aron maglikay sa tulis lagi. Unya six million sa wala pa manira? Makapaduda?
Laing pangutana. Nadakpan man ug napatay ang kadaghanan sa mga tulisan, asa man ang jewelries ug cash nga natulis karon? Nganong wala man ma-recover? Toa sa gipangita pa nga mga suspek? Sa ato pa, wala pa magbahin ang mga tulisan sa wala pa sila madakpi ug mapatay? Unya kadtong mga napatay, nangilog gyud kaha to sila og armas sa mga pulis? O gi-salvage? (bobbygnalzaro@gmail.com)