ASA MO? Gihansakan og atubangan ni Kawhi Leonard (tuo) sa Los Angeles Clippers sila si Anthony Davis, JaVale McGee sa Los Angeles Clippers atol sa ilang duwa kagahapon sa pagsugod sa 2019 NBA Season. (AP)
ASA MO? Gihansakan og atubangan ni Kawhi Leonard (tuo) sa Los Angeles Clippers sila si Anthony Davis, JaVale McGee sa Los Angeles Clippers atol sa ilang duwa kagahapon sa pagsugod sa 2019 NBA Season. (AP)

Raptors, Clippers gilihian og daog

GISUGDAN ni Kawhi Leonard ug sa Los Angeles Clippers ang ilang kampanya pinaagi sa pagmakmak sa host Los Angeles Lakers, 112-102, kagahapon sa pagsugod sa National Basketball Association (NBA) 2019-20 season sa Staples Center.

Si Leonard, kinsa maoy Finals MVP dihang giagak niya ang Toronto Raptors sa kampiyunato sa miaging season sa wala pa siya mitapon sa Clippers, nagpakatap og 30 puntos aron pangulohan ang kadaugan.

Nidugang og 21 puntos si Lou Williams samtang niamot og 17 puntos si Montrezl Harrell.

Ang Lakers, nga gikonsiderar sab nga usa sa sayong mga paborito nga makakuha sa titulo ning maong season, gipangulohan ni Danny Green pinaagi sa iyang 28 puntos, nidugang og 25 puntos si Anthony Davis samtang nihatag og 18 puntos si 4-time MVP LeBron James.

Naangkon sa Clippers ang kadaugan bisan wala ang usa sa bag-o nilang mga pambato nga si Paul George, kinsa padayon pang nagpaalim sa angol sa iyang abaga.

Mibida man tuod si Leonard sa kadaugan apan mas nikawat og dakong atensyon ang reserbang mga magduduwa sa Clippers nga ninglubong sa ilang mga kaparang sa Lakers sa pinuntosay, 60-19.

Gikan sa 85-85 nga panagtabla, ang Clippers ningpabulhot og 19-7 run sa 4th quarter aron pagposte og 104-92 nga labaw. Ning maong ratsada sa Clippers, lima ka mga magduduwa ang nagpulipuli pagmugna og puntos.

Sa nahabiling kapin sa upat ka mga minutos, ang mga sumosunod sa Lakers misuway pagdasig sa ilang team pinaagi sa pag-abiba og “Let’s go, Lakers! Let’s go, Lakers!” apan wala kini mosaler.

Raptors 130, Pelicans 122 (OT)

Sa laing duwa, gipakita sa Raptors nga wala gihapon sila’y ikabuga bisan gibiyaan sila ni Leonard pinaagi overtime nga kadaugan batok sa New Orleans Pelicans.

Nimugna og bag-ong career-high nga 34 puntos si Fred VanVleet aron pangulohan ang Raptors samtang nidugang sab og 34 puntos si Pascal Siakam ug 18 rebounds.

“Pascal and Freddy, they are the young core, they are the guys who will carry this thing on,” batbat sa usa sa mga sinaligan sa Raptors nga si Kyle Lowry. “I’m so happy for those guys to go out and perform like tonight. We’ll see them grow all year.”

Si Lowry nidugang og 22 puntos alang sa Raptors.

“It’s very fun to be in the position that we’re in where we just won it but we’re kind of on the climb again,” matod ni VanVleet.

Ang Pelicans gipangulohan ni Brandon Ingram pinaagi sa iyang 22 puntos samtang nihatag og 15 puntos si Josh Hart.

Ningkombati ang Pelicans nga wala ang ilang eksplosibong No.1 overall pick nga si Zion Williamson, kinsa nagpaalim pa sa iyang angol sa tiil. (AP, ESL)

Related Stories

No stories found.
SunStar Publishing Inc.
www.sunstar.com.ph