MGA duwa karon
5:15 pm- SWU batok UCLM (High School)
6:45 pm- UC batok USPF (College)
Mosagubang na sab og laing malisod nga pagsuway ang University of Cebu (UC) Webmasters sa ilang tinguhang makapatong sa top two sa pagpadayon sa mga aksyon sa Cebu Schools Athletic Foundation Inc. (CESAFI) basketball college division.
Ang Webmasters makigsangka sa University of Southern Philippines Foundation (USPF) Panthers sa main game karong gabii sa Cebu Coliseum.
Ang Webmasters kasamtangangang naa sa ikaupat nga posisyon dala ang 5-3 nga rekord.
Aron makumpayot pa og luna sa top two, ang Webmasters nagkinahanglang moharos pagdaog sa nahabilin nilang upat ka mga duwa sugod karon ug mag-ampo nga dili makaabot og siyam ka mga daog ang duha sa tulo ka teams nga nag-una kanila sa standing.
Gipangtumbok mao ang Southwestern University (SWU-Phinma) Cobras (7-2), University of San Carlos (USC) Warriors (7-3), ug defending champions University of the Visayas (UV) Green Lancers (6-3).
Ang top two teams human sa eliminasyon makapanag-iya og twice-to-beat nga bintaha sa semi-finals.
Ang Webmasters adunay taas nga moral ning sangkaa gumikan kay gikan sila sa duha ka sunodsunod nga kadaugan.
Tagakunon na man tuod ang Panthers dala ang 3-7 nga rekord apan taas sab ang ilang moral ning sangkaa gumikan kay ilaha pang gipanglupig ang Webmasters, 78-72, sa 1st round elimination.
Hinuon grabe ang pressure sa Panthers gumikan kay hingpit mang mawala ang ilang paglaom nga makasulod sa semi-finals kon mapilde sila og usa sa katapusan nilang duha ka mga duwa gikan karon.
Sa premirong duwa, magsangka ang parehong nagkagidlay nga SWU-Phinma Baby Cobras ug University of Cebu Lapu-Lapu Mandaue (UCLM) sa high school division.
Ang Baby Cobras adunay 2-6 nga rekord samtang ang UCLM naggunit og 1-6 nga baraha. (ESL)