SA MAKAPAKURAT nga wala damhang panghitabo sa Maharlika Pilipinas Basketball League (MPBL), gibuhian sa Bacolod Master Sardines ang usa sa ilang labing sinaligan nga mao ang Sugbuanong si MacMac Tallo.
Mismong ang 25 anyos nga basketbolista ang mikompirmar niini sa Sun.Star Cebu, igsuong buhatan ning mantalaan.
Ang produkto sa Southwestern University (SWU-Phinma))-Cobras wala mohatag og klarong detalye kon unsa’y hinungdan sa iyang pagtangtang sa team ug igo lang kining mibutyag aduna sila’y wala nga pagsinabtanay ni Bacolod coach Vic Ycasiano.
“Siyempre, malungkot kasi lahat ng players dun sobrang napalapit na ako sa kanila. Pero ayun nga if it’s Gods will, susundin ko,” matod sa kanhi two-time MVP sa Cebu Schools Athletic Foundation Inc. (CESAFI).
Sa kasamtangan, wala pa masayri kon asa sunod nga makaduwa si Tallo.
Gipasabot ni Tallo nga adunay ubay-ubay nga teams sa MPBL ang ningpadayag og intensyon sa pagkuha kaniya apan alang ni Tallo, dili pa siya makadesisyon sa pakakaron.
Si Tallo nakasulod sa Philippine Basketball Association (PBA) niadtong 2017 isip 10th overall pick sa Talk N Text KaTropa niadtong 2017.
Pipila ka buwan isip sakop sa TNT, si Tallo gi-trade ngadto sa NLEX Road Warriors ubos ni coach Yeng Guiao. Apan sa kalit lang gibuhian ra usab gilayon kini hinungdan nga mitapon kini sa MPBL sa dihang gitanyagan sa Bacolod. (ESL)