KINING pagluwat ni Joel Mari Yu, chairman sa board of directors sa Metropolitan Cebu Water District (MCWD), uban sa general manager nga si Jose Eugene Singson Jr. sa ilang tagsa-tagsa ka katungdanan naghatag og dakong indikasyon.
Buot natong ipasabot nga nag-ung-ong na sa kalampusan ang kampo ni Cebu City Mayor Edgar Labella sa pagpalagpot niadtong mga tawo ni kanhi Mayor Tomas Osmena.
Kini tungod kay dili halayo ang posibilidad nga kining ubang nahabilin nga mga sakop sa board nga sila si Augustos Pe Jr., Ralph Sevilla, Cecilla Jugao- Adlawan ug Procopio Fernandez mosunod sa pagkawagtang o mapugos usab sa pagbiya.
Apan wa usab kini magpasabot nga sa pag take-over na unya sa mga bag-ong hut-ong sa board nga mga tinudlo na ni Labella, garantisado nga masulbad ang problema sa kanihit sa tubig.
Kini kay sa pagkakaron wa pa tay nakita o way nahikyad nga solusyon ang Dakbayan nga maoy ilang ikadalit sa higayon nga moasumir na sila sa ilang puwesto.
Ang nahitabo man gud karon kay giuna sa kasamtangang administrasyon ang pulitikanhong kamada kay sa pagpangita og solusyon nga makaabag unta sa maong ahensiya.
Sukwahi kini sa gihimo sa dakbayan sa Lapu-lapu diin ang local government unit mismo maoy nangita og paagi aron makaayuda sa MCWD.
Pananglitan, si Mayor Junard “Ahong” Chan ug ang kadagkuan sa pribadong kompaniya nga mao ang CitiCore Summa (CS) Water nagpinirmahay na og kasabutan sa pagtukod og desalination plant nga motabang og supply og tubig ngadto sa mga residente sa siyudad sa Lapu-Lapu.
Imbis mobasol sa ahensiya, mas gipalabi pa ni Ahong nga makatabang sa pagpangita og sulbad sa problema.
Ug kon kini nahimo ni Ahong, way rason nganong dili kini mahimo sa ubang LGUs, ilabi na sa dakbayan sa Sugbo.