MAPUTOL ang bakasyon ni Norlan Petecio sa Barangay Tuban sa Sta. Cruz, Davao del Sur tungod gikinahanglan niyang mobalik sa Manila aron mangandam sa iyang ikaduha nga ASBC Asian Youth Boxing Championships stint karong Nobyembre 8 -18 sa capital city sa Mongolia nga Ulaanbaatar.
Ang 17-anyos nga si Petecio, manghud ni Aiba Women's World Boxing Championships featherweight gold medalist Nesthy Alcayde Petecio, motigi sa 60-kilogram division.
"Dili ko mag-promise pero buhaton nako ang tanan para makuha ang gold," niya sa pakighinabi sa SunStar Davao office, Jacinto Street, Davao City, Martes.
Niya, buot niyang manimalos sa kapildihan niya sa quarterfinals sa nakalabay nga tuig.
Si Norlan miapil sa national boxing team niadtong 2017, human siya madasig sa mga igsuong silang Nesthy ug Nice Zzaa.
Midaug siya kaniadto og silver medal sa Andaman Games sa Thailand.
"Pangarap man gud sa akong Papa na mag Olympics jud mi. Na-encourage ra pud ko nga musulod sa national team tungod sa akong mga ate."
Dugang niya, "Greatest dream nako mahimong Olympian para makatabang jud ko sa among pamilya. Pamilya muna bago sarili."