CALBAYOG City, Samar - Nasikop na ang usa ka batan-ong sakop sa New Peoples Army (NPA) human nieskapo sa Allen Sub Provincial Jail niadtong miaging Huwebes, Oktubre 17, 2019.
Ang suspek giila nga si Aljon Cardenas, taga Calbayog City, Samar. Si Cardenas usa sa mga rebeldeng NPA nga niatake sa Victoria Municipal Police Station diin tulo ka mga rebelde ang nakalas samtang dunay mga mga pulis nga naangol.
Si Cardenas nasikop sa kapulisan ug gibalhog og balik sa Allen, Northern Samar Sub Provincial Jail.
Sulod sa prisohan nisaulog sa iyang adlawng natawhan ug gipalitan pa og cake sa mga nagbantay kaniya.
Base sa report, milukso gikan sa unom ka metros nga paril si Cardenas, kinsa dali nga nisibat.
Sa hot pursuit operation sa kapulisan ug kasundalohan, nakadawat sila og report nga nakit-an si Cardenas sa Oquendo District, Calbayog, Samar.
Dali nga gilunsad ang operasyon batok sa pugante ug nasikop siya og balik.
Ang operasyon gipangulohan sa Calbayog Police pinangulohan ni Police Lieutenant Colonel Joel Garcia, iyang mga sakop ug Special Action Force.
Si Cardenas nag-atubang og kasong kalapasan sa Omnibus Election Code, robbery with homicide ug illegal possession of firearms and ammunition.
Naa na sa kustodiya sa kapulisan sa Calbayog ang suspek. (JKDP)