MAGSAYSAY, Davao del Sur -- Gidid-an na sa Philippine Institute of Volcanology and Seismology (Phivolcs) ang mga molupyo sa Purok 6, Barangay Malawanit nga magpabiling mopuyo sa lugar.
Kini human nga gibutyag sa Phivolcs nga modahili bisan unsang orasa ang mga nidako nga liki sa yuta tungod sa pagtay-og sa magnitude 6.3 nga linog.
Human gisukod sa Phivolcs ang mga liki sa mga yuta, nasuta nga mahimo kining modahili ilabi na kon makasinati og mga pag-uwan.
Gumikan niini, dili na mahimong kapuy-an ang lugar ilabi na nga nagpadayon ang mga aftershocks.
Milutaw sab sa imbestigasyon nga huyang ang pundasyon sa yuta tungod sa mga bato sa ilawom nga humok.
Gumikan niini, gitakdang magpatabang sa lokal nga gobyerno ang mga opisyal sa Barangay Malawanit aron makakita og relocation site sa mga apektadong molupyo.
Sumala ni Barangay Malawanit Kapitan Dennis Helbes nga anaa sa 50 ka mga pamilya ang maapektuhan mao nga gikinahanglan nga makakita dayon og kabalhinan kanila.
Gitataw ni Helbes nga misamot pa kadagko ang liki sa yuta tungod sa sagunsong aftershocks.
Sa nahitabong aftershocks niadtong Lunes sa gabii, Oktubre 21, nabati sab nga adunay milagapak sa tulay nga nagsumpay sa lungsod ug silingang Bansalan busa gisirado kini aron masuta sa mga eksperto.
Matud ni Mayor Arthur Davin nga lakip sa imbestigahan ang mga nabuak nga water reservoir mao nga gikinahanglan ang mga engineer aron masubay ang istruktura.
Kahinumdoman nga nibisita si Senador Bong Go niadtong Lunes aron manghatag og tabang sa 1,180 ka mga pamilyang apektado gikan sa 22 ka mga barangay. (Orlando B. Dinoy)