GIPAHILUNA na sa iyang pamilya ang patay nga lawas sa usa ka trabahante sa usa ka kompaniya sa Amakan, Barangay Cabantian, Buhangin District, Davao City human kini napalgang wala nay kinabuhi sud sa mixer.
Alas 11:45 sa buntag niadtong Lunes, Oktubre 21, napalgan na lang sud sa mixer ang patay nga lawas sa biktima nga si Albert Aligado, 42, ulitawo, empleyado sa Ready Blocks Corporation ug residente sa Kilometro 11, Cabayugan, Barangay Sasa, Davao City.
Sa inisyal nga imbestigasyon sa homicide section sa Buhangin Police Station, ulahing nakita sa mga kaubanan nga anaa tungod sa mixer ang biktima kay gisulayan niining ayohon ang bucket niini kay wa na mogana.
Nakita sab sa laing kauban ang biktima nga naglingkod sa ibabaw nga bahin sa mixer samtang nagkamada og hollow blocks.
Pipila ka oras ang milabay, gisubay sa pipila ka trabahante ang mga ekipo sa kompaniya aron pamalungon.
Apan sa ilang pagsubay sa mixer, ilang nakita ang patay nga lawas sa biktima.
Migula sa imbestigasyon sa kapulisan nga walay foul play ang nahitabo ug aksidente lang.
Gituohan nga nahulog ang biktima sud sa mixer samtang nagkamada og hollow blocks.
Dunay mga bun-og ug samad ang biktima nga maoy hinungdan sa iyang hinanaling kamatayon.