MOABOT og P1 milyon nga balor sa gituohang shabu nasakmit sa mga operatiba sa duha ka buwag nga mga buy-bust sa Drug Enforcement Unit (DEU) sa duha ka mga presinto sa Cebu City Police Office (CCPO).
Unang buy-bust gihimo sa Mambaling police nga gipangulohan ni P/Capt. Francis Renz Talosig .
Ilang target ang suspetsadong drug courier nga si John Lenard Gonzales, 19, taga dan Tres de Abril, Barangay Labangon, Siyudad sa Sugbo.
Nasakmit gikan kang Gonzales ang P884,000 nga balor sa shabu.
Gikonsiderar ni Talosig si Gonzales nga high value target bisan pa sa kabatan-on niini nga drug courier.
“Actually nahibal-an namo nga suholan ni siya unya tagaan pud siya og shabu nga maoy iyang baligya,”matod ni Talosig.
Usa ka semana nga gi-monitor si Gonzales hangtod gihimo ang buy-bust sa Martes sa gabii, Oktubre 22.
Samtang laing drug personality nadakpan sa samang gabii sa usa ka hotel sa Barangay Mabolo ning siyudad.
Si Rowena Legaspi, 34, taga dan T.Padilla, Barangay T.Padilla ning siyudad nasikop.
Nakuha gikan kang Legaspi ang usa ka medium sized nga putos sa gituohang shabu nga mobalor og P136,000.
Matod pa ni P/Maj. Dindo Juanito Alaras, hepe sa Mabolo Police, nga usa ka informant ang mihatag kanila og kasayuran sa kadudahang lihok ni Legaspi dihang naka check-in sa hotel.
Dugang pa ni Alaras nga si Legaspi nag check-in pa Lunes dihang namatikdan na siya sa informant.
Samtang sa Dakbayan sa Talisay, tulo ka giila nga bag-ong durugista nasikop sa buy-bust operation sa kapulisan, wa na paabuta nga makapalambo sa ilang ilegal nga patigayon ang tulo.
Nasikop sila sa sitio Holy Child, Barangay Bulacao, Siyudad sa Talisay, pasado ala 1 sa kaadlawon, Martes sa buntag, Oktubre 23.
Ang mga suspek giila nga sila si Jomar Abarquez, 32,; John Philip Sawit Galleto, 30; ug James Ivan Labora, 32.
Gitug-an ni Police Major Gerard Ace Pelare, hepe Talisay City Police Station, subject nila sa operasyon mao si Abarquez, kinsa gitumbok nga maoy tigpayuhot og ilegal nga drugas. Gikompirmar ni Pelare nga street level pusher pa lang si Abarquez sa Bulacao, apan wala na nila paabuta pa nga makapalambo kini sa ilegal nga negusyo.
Dugang ni Pelare nga unta magsilbi na kini nga warning sa mga nagumon sa drugas nga ang mga mga pulis di kapuyon sa paggukod kanila.Ang tulo ang gipasakaan na og kaso sa pagpamaligya og illegal drugs Martes sa hapon.