HINGUSGAN sa usa ka opisyal sa Misamis Oriental nga himoan og ordinansa ang seguridad sa kadalanan diin nag-unang hinungdan sa kamatayon sa lalawigan ang bangga.
Matud ni Sangguniang Panlalawigan Board Member Dexter Yasay nga niabot sa iyang atensyon kini nga problema ug pagbalik sa sesyon karong Nobiyembre 11.
Gibutyag niini nga iyang paningkamotan nga mahatagan kini og pagtagad nga problema sa matag lungsod aron dili na magsige og ihap sa mga naaksidente kundili aron nga maproteksyunan ang mga motorista.
Nakita ni Yasay nga dili lang ang pagmaneho nga hubog ang usa sa hinungdan sa mga aksidente kundili lakip na niini ang walay klarong mga signages labina kung adunay gitrabaho nga mga kadalanan ang Department of Public Works and Highways (DPWH).
Dugang ni Yasay nga dili igo nga mabutangan lang og reflector ang kadalanan kundili kinahanglan ang tawo nga magbantay niini 24 oras.
Dugang niini nga iyang tun-an nga makahimo og ordinansa nga tanan implementasyon sa national government, labina sa mga national roads nga kung adunay konstruksyon sa dalan.
“Rest assured amo na idala sa plenary, hopefully makahimo ta ana nga polisiya kay kinahanglan gyod kaayo na siya,” pasabot ni Yasay.
Samtang kamulo kini niya nga gitun-an aron mapaabot sa hawanan sa Sangguniang Panlalawigan ug iyang gipaabot ngadto sa mga motorista labina niadtong nagmaneho oga motorsiklo nga magbinantayon ug magkalma.
“Hangyo ko nga extra careful, kabalo man ta motorsiklo ilang gisakyan dili makigukod sa tag-as nga mga sakyanan, hangyo ko ikalma ang ulo dili magdali kay imbes magdali dita kaabot sa atong balay didto ta moabot sa sementeryo,” butyag niini.