NAGPAHIMANGNO ang Bureau of Fire Protection (BFP) sa katawhan ilabi na sa nagkaduol nga kasaulogan sa Pasko ug sa sunod-sunod nga nahitabong sunog sa siyudad sa Cagayan de Oro.
Gibutyag ni Fire Inspector Sam Lawrence Velarde sa BFP-Northern Mindanao nga kinahanglan nga likayan ang mga paglapoglapog ug bantayan usab ang mga appliances nga dili mapasagdan nga nakapansak sa outlet sa kuryente.
“Utro na pahimangno namo be aware ta sa mga cause sa sunog sa panimalay labi na kung made of light materials ang atong balay no ,atong appliances atong palungon di basta-basta maglapog kung naa tay duol nga panimalay nga light materials,” matud ni Velarde.
Gidugang pa niini nga mas magbinantayon ang katawhan ilabi na nga bulan na sa Oktubre ug nagkaduol na ang pasko.
“Ang mga gadgets, labi na mga bata dili padulaon og mga posporo, lighter ug unsa pa diha labi na karon nga duol na ang Pasko,” dugang pa.
Kahinumduman nga laing sunog na usab ang nahibtao sa Barangay 9 ning siyudad kagahapon sa kaadlawon, Oktubre 23 nga gibanabanang P750,000 ang natalang damyos human gilamoy ang duha ka mga panimalay ug nalakbitan usab gamay sa kalayo ang Barangay hall sa maong Barangay nga giingong bag-ohay lang nga gi-ayo ug gibag-o.
Niadtong Oktubre 22 usab sa hapon, mga 50 ka balay sa Barangay Nazareth ang naugdaw tungod sa sunog.