NASAKMIT sa Task Force Davao (TFD) ang gibanabana nga P370,000 kantidad sa gituohang shabu sa Lasang checkpoint Huwebes sa kaadlawon, Oktubre 24, kon diin uban niini gitago sulod sa marker pen.
Base sa taho sa TFD nga wala lang mag-usa ka semana human makasakmit og kapin milyon nga kantidad sa gituohang shabu sa Sirawan checkpoint, laing drug couriers nadakpan sa Lasang checkpoint pag Oktubre 24.
Nahimo kini pinaagi sa hiniusang Armed Forces of the Philippines-Philippine National Police (AFP-PNP) checkpoint sa TG Lawin, TFD ug Police Station (PS) 6 Bunawan sa Davao City Police Office (DCPO).
Duha ka mga tawo ang nadakpan sa hiniusang puwersa nga nailang sila Jay Conol Sasil, 47, minyo, ug molupyo sa San Antonio, Agdao, Davao City; ug Jay Mark Gonesto Torejas, 36, ulitawo ug molupyo sa San Miguel St, Dumanlas, Buhangin District, Davao City.
Nakuha gikan sa posisyon ni Sasil mao ang usa ka jumbo size sachet sa gituohang shabu nga nitimbang og gibanabanang kapin kun kulang 13 gramos nga dunay street value nga P195,000 samtang ang kang Torejas, nakuha sab ang usa ka jumbo size sachet sa gituohang shabu nga dunay timbang nga 12.05 gramos kon gibanabana nga dunay street value nga P180,750.
Mga kontrabando nga nagtimbang tanan og 25.05 gramos uban sa gibanabana nga street value nga P375,750.
Nasayran nga mga suspek sakay sa Starex van nga gimaneho ni Sasil gikan sa Mati, Davao Oriental padulong sa Davao City sa dihang gihiling sa light vehicle inspection area.
Ang taho sa TFD nagkanayon nga atol sa pagsusi, ang on-duty nga Cafgu Active Auxiliaries (CAA) II nakamatikod og way sulod nga marker pen sa dashboard sa maong sakyanan ni Sasil.
Hinungdan nga ang inspektor nihangyo og tabang gikan sa PNP team leader nga mohimo og subsob nga pagsusi.
Ang pagsusi niresulta sa pagkasakmit sa duha ka two jumbo-sized sachets sa gituohang shabu nga gitagoan sa driver side sa dashboard sa maong sakyanan.
Ang nakuhang mga butang gitunol ngadto ni Police Corporal Nelson sa Bunawan PNP alang sa saktong disposasyon ug pagpasaka og kaso.
“TF Davao will not allow drug pushers to enter Davao City unchecked. TFD is warning the pusher to stop it. TFD conducted last week a workshop for the sharing of best practices in drug apprehension and has developed tactics techniques and procedures (TTPs) to counter their modus in illegal drugs,” butyag pa sa TFD. (JCR)