MAGSAYSAY, Davao del Sur -- Nasubo ang lokal nga gobyerno sa lungsod human nga nadugangan og usa ang namatay sa pagtay-og sa magnitude 6.3 nga linog niadtong Oktubre 16 sa gabii.
Tungod niini, niabot na og kwatro ka tawo ang namatay sa maong kalamidad kon diin ang uwahing namatay mao si Rosita Botilla Quilla, 50, molupyo sa Purok 12, Barangay Poblacion.
Nasayran nga nahagbungan og mga hollow blocks ang biktima sud sa tindahan sa iyang maguwang nga si Merlyn kay giluwas niya kini sa sulod.
Matud ni Anthony Allada, tigpamaba sa lokal nga gobyerno, nga namatay si Quilla alas 8 sa gabii niadtong Martes, Oktubre 22, sud sa unom ka adlaw nga gitambalan.
Nasayran nga namalit og katol si Rosita niadtong gabhiona apan dihang naabtan og linog, dali niyang gipagawas ang igsuon ug namungko sila sa gawas.
Apan gisaysay ni Merlyn nga kalit lang nituay ang iyang igsuon ug nasuta nga naigo na sa nahugmak nga hollow blocks.
Gidala dayon nila sa tambalanan ang biktima apan wa na maka-agwanta sud sa Southern Philippines Medical Center sa Davao City.
Laing 43 pa ka mga naangol sa linog ang padayong giatiman sa nagkadaiyang bay tambalanan.
Kahinumdoman nga unang namatay si Crisjoy Roda, 2, taga Barangay Centro, San Isidro, human wa na matabang sa mga doktor sa Gonzales-Maranan Hospital sa Digos City.
Namatay sab sa linog si Arjean Abundo ug siyam ka bulang anak nga si Jay Jay, dihang natabunan ang ilang balay sa midahili nga yuta sa Brgy. Malawanit.
Gihaya na sa ilang balay si Rosita ug gitakdang ilubong human sa kalag-kalag.
Gipasalig hinuon sa lokal nga gobyerno nga tabangan ang pamilya sa mga biktima.
Sumala ni Mayor Arthur Davin nga mihatag na sab og P20,000 ang Office of the Civil Defense ug modugang ang lokal nga gobyerno og P10,000 aron magamit sa paghatag og disenteng lubong sa namatay.