USA ka mag-aawit si Adorico. Anaa siya magkantahan sa usa ka inilang night club sa siyudad. Nabaniog na ang New Horizon Night Club nga mao kanunay adtuon sa edad-edaran nang managtiayon ug mga hamtong nang managhigugmaay, mao nga ania karon ning orasa sa kagabhion si Armida, biyuda ug magdadayeg ni Adorico. Alang kang Armida, nindot og tingog si Adorico nga kon imong paminawon mora kag ganuyon ngadto sa mamingawng kalibutan ug matagbaw gyud ang imong kalag. Adunahan siya ug nagpuyo sa usa ka mansiyon.
Si Adorico nailhan sa iyang pagka mag-aawit dihang siyay nahimong kampeyon sa tigi sa awit nga gipasiugdahan sa usa ka radio station. Tungod niini daghan nang moimbitar kaniya sa mga pista o pangilin sa siyudad ug ingon man sa probinsiya. Ug kay gihangyo man siya sa tag-iya sa night club nga duna siyay lugar sa pag-awit matag gabii, maong ania siya karong gabhiona. Ug si Armida gibati og paghigugma kangAdorico. Halos kada gabii ania siya aron maminaw sa mga awit ni Adorico.
Dihang nagsaulog si Armida sa iyang birthday giimbitar niya si Adorico. Way lain nga giimbitar si Armida. Giawitan siya ni Adorico sa awit ni Nat King Cole nga ‘When I Fall in Love.’ Misamot ang paghigugma ni Armida sa ulitawo.
Human sa awit ni Adorico may gisulti si Armida.
“Adorico, gusto ko nga anhi ka na lang puyo uban kanako. Nag-inusara na lang ko dinhi sa akong mansiyon. Please, sabta ko. Mahal ko ikaw. Gihigugma ko dili lang ang imong tingog, kundili ikaw gayud mismo,” padayag ni Armida sa iyang pagbati. “Bahandianon ako, Adorico, mao nga magmalipayon ka gyud uban kanako.”
“May hinigugma na ko, Ma’m. Ug kaslunon na ako kaniya,” tug-an ni Adorico sa hinay nga tingog.
“Kon mao kana, dili ka na diay maako!” ni Armida nga kalit namula ang nawong sa kasuko. “Maypag patyon ko ikaw, Adorico!” Giukban ni Armida ang iyang bag ug gipagawas ang pistola. Gition niya kini kang Adorico ug gikablit ang gatilyo. Milanog ang tulo ka nagsunod nga buto. Natumba si Adorico.
Ang patayng lawas ni Adorico gidala ni Armida sa ‘underground’ sa mansiyon.
Nanglabay ang daghang mga adlaw. Usa ka gabii nadunggan sa mga katabang, lakip na ang hardinero, ang tingog ni Armida nga nagsinggit, “Ayawwww, ayaw na ko pandungga sa imong awit, Adorico! Pasayloa ko! Tungod kay gihigugma ko ikaw, gihunosan ko ikaw sa imong kinabuhi aron anhi ka na dinhi uban kanako hangtod sa hangtod. Ayawww, Ayaw na intawon ako padungga sa imong awit!”
Ug mabati dayon ang lanog nga danguyngoy ni Armida. (KATAPUSAN)