MORA lang og bag-o pa kaayo nga gipangutana ko ni kanhi Editor-in-Chief sa Sun.Star Cebu nga si Atty. Pachico Seares kon makamao ba ko mo-Binisaya. Abi nakog nagkomedya lang siya kay Bisaya gud kong daku.
Diay nagplano sila nga mohimo og laing mantalaan, ning tungora, ginamit ang pinulongang Bisaya. Tuod man, natuman gyud ug usa ko sa mga kolumnista nga gitugyanan sa natad sa kalingawan.
Niadtong Miyerkules, gisaulog namo ang ika-25 ka tuig sa Super Balita. Bayente-singko na diay ka tuig sukad adtong panag-istorya namo ni Atty. Seares.
Mga panghinaut sa lain pang 25 ka tuig ug sobra pa alang sa Super Balita!
•••
Nakaistorya namo ang mga artista sa bag-ong teleserye sa Kapuso Network, GMA 7, nga Beautiful Justice nga sila si Yasmien Kurdi, Gabbi Garcia, Derreck Monasterio ug Gil Cuerva adtong Okt. 19.
Morag girl nga way r ug morag Guillermo nga way u. Mao ni ang paghulagway ni Gil kon unsaon paglitok ang iyang ngalan. Iya gyung gipaputol ang iyang kanhi taas nga buhok (nga gamit unta kaayo isip kanhi international model) tungod ug alang sa Beautiful Justice.
Di siya pili-an kon artistang babaye sa GMA 7 ang hisgutan. Makatrabaho siya kauban kang bisan kinsa.
Suportado sa Phil. Drug Enforcement Agency (PDEA) ang teleserye. Gani dunay taga PDEA nga mag-obserbar samtang magsyuting sila.
Dunay mga eksena nga didto nila gisyut sulod sa ahensya labi na kanang eksena nga magmiting sila. Usahay adto sila mangatulog inig human og syuting.
Matud ni Yasmien ug Gabbi, layo ra sa istorya sa Charlie’s Angels ang ilang proyekto, gawas nga way Charlie sa istorya. Gihatagan og importansya dinhi ang katakus sa mga babaye nga mosalig ug modepensa sa kaugalingon ug mosukol sa mga kaaway ug mga kahigayunan nga moabot kanila.
Gihangop ni Derrick ang panag-uban nila sa unang higayon ug iyang gihulagway nga dunay bag-ong chemistry nga namugna tali sa mga artista ang maong proyekto.
Nanghinaut ang upat nga padayong suportahan sa mga tumatan-aw ang Beautiful Justice kada gabii, Lunes hangtud Biyernes, inig human gyud sa 24 Oras.
•••
Hellcome Home ang bag-ong pelikula sa Star Cinema diin sila si Dennis Trillo, Alyssa Muhlach, Beauty Gonzales ug Raymond Bagatsing ang mga bida. Kuyaw-kuyaw ang pelikula ug maimadyin nako nga sininggitay ang mahitabo sulod sa sinehan sugod sa Okt. 30. Seguradong malingaw ko ani.