Rabacal: Gwardiya nagmika o kumboya?

TINUOD nga kadudahan ang mga gwardiya nga nadestino niadtong Sabado sa gabii atul pagtulis sa J Center Mall. Nasayran mismo gikan sa security and safety manager sa mall nga si Gaspar Malanquis nga gidid-an nila ang ilang mga gwardiya, bisan gani ang mga pulis, nga magdala og armas sulod sa mall. Mahadlok sila nga tingalig adunay pinusilay nga makahatag og kakuyaw sa mga shoppers. Suma kang Police Colonel Ildibrande Usana, deputy regional director for administration nga ang mga gwardiya sa mall way mga armas. Mahimo man unta nga ang ilang mga gwardiya lang ang padad-on og armas og way lain.

Ang nakaparat kay samtang estrikto sila sa pagdili sa pagda og armas sa sud apan sa nakuha sa CCTV ang 14-15 ka kadudahang mga lalake nakasud nga nagdala og armas. Wala bay ekipo ang mall security sa paghibawo kon anaay dalang armas ang usa ka tawo? Kadudahan man unta nganong wala man sila kapkapi sa gwardiya?

Daku kining kahaguka sa security sa J Center Mall nga kadudahan kon kaabin ang mga gwardiya sa mga tulisan. Kinahanglang manubag ang security agency ug ang management sa mall sa maong tulis.

•••

Panahun nang manaug ang mga sakop sa board sa Metropolitan Cebu Water District (MCWD). Masabut man tingali ang paglangay nila sa pagbiya sa ilang pwesto apan wala na silay magamit nga katarungan nganong magpabilin sila sa pwesto. Kining mga argumento legal mahimong debatihan sa korte apan sa pagka-karon ang mga mayor sa Metro Cebu ug ang gobernador gusto nga ilisdan sila sa katungdanan. Maka-uuwaw na kining ilang pag-insister nga wala sila hatagi og due process. Ang masakit nga kamatuoran mao nga wala nay kunsomidor sa MCWD nga nalipay sa ilang buhat. Atong panghinaut nga dili lang unta madako kining maong problema diha sa MCWD kay maapektuhan unya hinuon ang ubang mga empliyado sa maong water district. Hatagan nato og higayon ang bag-ong itudlong mga director sa maong buhatan aron mapangitaan og solusyon ang atong gi-atubang nga water crisis.

•••

Giputol ni Presidente Rodrigo Duterte ang iya untang tulo ka adlaw nga pagbisita sa Japan. Mitambong siya sa pagkorona ni Emperor Naruhito niadtong Martes. Miabut siya sa Japan niadtong Lunes og gikatakda pa untang siyang mubalik sa Pilipinas niadtong Miyerkules. Miuli siya tungod sa dili maagwantang sakit sa iyang spinal column duol sa pelvic bone. Wala na siya makatambung sa bangkite human sa kuronasyon apan ang iyang anak, Davao City Mayor Sarah Duterte Carpio maoy mi-representar kaniya.

Bisan kon mipasalig ang Malacanang nga gawas niining maong sakit maayo ang panglawas ni Presidente Duterte. Apan dili na lang ako mahibung kon ang oposisyon mupadako niining gibati sa presidente. Mangayo na usab unya sila sa tinuod nga kahimtang sa panglawas niini. Makita man nato nga dili pa gayud ingon niana ka grabe ang panglawas sa presidente maayo tingaling atong hikutahon ang mga importanting bulohaton nga maghatag og kaayuhan sa yano natong kaigsuonan. (mannyrabacal1144@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph