KINING atong nga magbabalaod bisan unsa na lay mosulod sa ilang utok himoan dayon og balaod. Wala gani maghuna-huna og unsay mamahimong implikasyon sa ilang mga sugyot balaodnon. Aniay laing hinanggaw nga balaodnon ang gisugyot sa usa ka partylist representative. Si Probinsiyano Ako partylist Rep. Jose Singson Jr., misang-at og sugyot balaodnon nga mag-expand o maglugway sa probationary period sa usa ka aplikante gikan sa unom ka buwan ngadto sa duha ka tuig.
Pero kadyot ra, kining Probinsiyano Ako Partylist lahi pod kini sa Ang Probinsyano. Pareho ni sa Ang Bisaya partylist unya naa poy Ako Bisdak. Ambot og nganong gi-accredit man ni sa Commission on Elections (Comelec) nga pareho ra man ni sila og gi-representahan? Usa ra unta kay puro ra man mga Bisaya ang ilang gi-representahan kunuhay. Nag-usik-usik ra man ni kuwarta sa mga magbubuhis unya pareho ra ang representasyon. Pero ambot og kining mga partylist groups nag-representar ba gyud sa mga marginalized sector sa atong katilingban.
Ang tumong og rason aning Singson nganong iyang lugwayan ngadto sa duha ka tuig ang probationary period aron gyud kuno nga ma-train sa pag-ayo ang aplikante. Dili pa igo ang unom ka buwan kay adunay mga trabaho labi pa ang mga nagkinahanglan og talent nga i-train gyud og maayo ang aplikante. Anaa sa atong Labor Code nga unom ka buwan lang ang probationary period og human niini, pahibaw-on ang aplikante kon dawaton ba isip regalar o dili.
Laing rason ni Kong. Singson mao nga; walay government intervention o dili manghilabot ang gobiyerno sa trabaho sa pribadong sektor labi pa sa paghire og mga trabahante. Lain pa gyud, gumikan sa pagdis-og sa teknolohiya, posibleng wala na magkinahanglan nga i-regular ang mga empliyado kay contractual na lang gumikan sa posibleng maabtan sa pagdis-og sa teknolohiya.
Ambot og asa nakapusta ning maong partylist? Atoa pa sa mga kapitalista o sa mga ordinaryong mga mamumuo? Nagduda ko ani nga gipaluyohan ni sa mga kapitalista.