“DILI hukman.”
Kini ang hangyo ni Misamis Oriental Governor Bambi Emano sa pagkasikop ni kanhi Cagayan de Oro Bise Mayor Caesar Ian Acenas sa Criminal Investigation and Detection Group (CIDG)-Central Visayas sa Cebu City.
Nasubo kini sa gidangatan sa kanhi bise mayor nga iyang gikonsiderang matarong ug walay record sa korapsyon sa pagpangatungdanan niini.
“Sama sa akong amahan Dongkoy Emano nga maoy nagpili ni Acenas nga mahimong bise mayor sa Cagayan de Oro City kaniadto tungod sa iyang dakung pagsalig niini, ingon ana usab ang akong pag-ila kaniya kang kansang talaan sa pagserbisyo walay tatsa sa mga kontrobersiya, anomalya ug corruption,” matud ni Emano.
Tungod niini, iyang gihangyo ang provincial information office head si Carlo Dugaduga nga adtoan si Acenas sa Cebu aron sutaon kung aduna ba kini abugado.
“Dili lalim ang iyang kasinatian maoy hinungdan nga namalihug ko ni PIO Carlo Guzman Dugaduga nga ug mahimo matabangan si Vice Mayor Ian Acenas nga maadtuan ug abogado didto sa buhatan sa CIDG Region 7 kay si Carlo Dugaduga taga didto man ug nagtuo ko nga naa siya’y mga kaila nga abogado nga makatabang ni Vice Mayor Acenas,” kini ang kamandoan ni Emano.
Gihangyu ni Emano ang mga katawhan nga dili lamang dayun hukman si Vice Mayor Acenas ug tugutan nga makapadayag sa iyang habig sa publiko, sa balaud ug labaw na sa hukmanan.
Si Acenas nadakpan human nalambigit sa double you money scheme.