NAGPADAYON sa iyang light training sa US si IBF super flyweight world champion “Pretty Boy” Jerwin Ancajas isip preparasyon sa iyang pagpakigsangka ni Méxican challenger Jonathan “Titan” Rodriguez karong Nobyembre 2, 2019 sa Dignity Health Sports Park sa Carson, California.
“Palagi aabot ng 12 rounds ang plano namin, pero pag may pagkakataon or opening kunin po ni Jerwin (Ancajas) ang knockout win,” matod ni coach Joven Jimenez ang trainer/manager ni Ancajas sa interview sa Superbalita Cebu.
Si Ancajas, sakop sa Manny Pacquiao (MP) Promotions, nga taga Panabo City, Davao del Norte nga adunay (31-1-2, 21KO), modepensa sa iyang kampiyonato sa ikawalong higayon batok ni Rodriguez (21-1, 15 KO).
Matod pa ni Jimenez, nga bisan og anaa sa mabugnaw panahon wa kini makaapekto sa ilang training ug anaa sa ensaktong kondisyon si Ancajas.
“Tama lang ang lamig, yes po maganda ang condition ni Jerwin pagdating dito sa Amerika. Diri lang mi nag training sa gipuy-an namo at walang problema sa timbang,” dugang ni Jimenez kansang amahan lumad nga taga Badian, Cebu apan atoa na nanimuyo sa Dangcagan, Bukidnon Province. (Daniel Quindao Guden, US Correspondent)