HUGOT nga panagtigi ang gipaabot nga masaksihan sa dihang sugdan na karong Nobiyembre 3, adlawng Dominggo, ang ika-11 nga edisyon sa Carcar City Mayor’s Cup semi-commercial tournament diha sa Carcar City Sports Complex.
Atol sa press conference nga gipahigayon kagahapon sa Rafael’s Sports Cafe sa SM Seaside City, gibutyag sa mga nagpasiugda ang mga teams nga mosalmot sa usa ka semanang torneyo. Kini mao ang Team Khecel, Lapu-lapu, South Dreamers ug Kyrie Dave.
Ang torneyo mosunod sa single round robin format diin ang top two teams maoy magsangka alang sa championship samtang ang no. 3 ug no. 4 teams ang mag-ilog alang sa third place honor.
Ubos usab sa lagda, nasabutan nga mga local players lang ang makaduwa sa elimination round apan tugotan kini nga makakuha og import sa championship game.
Sa opening day, ang Khecel nga pangulohan nila ni Joshua dela Cerna, Kyle Ruedas ug Jaylor Castro, makigsangka sa Lapu-lapu nga gibituonan nila ni Tanciong Bungangciso ug Loyd Solis.
Sa main game, ang South Dreamers mosuway usab sa katakos sa Kyrie Dave, ang runner-up sa bag-o lang natapos nga Aloguinsan Mayor’s Cup.
Mobida sa South Dreamers sila si Richmond Lapinid ug Richmond Bersabal samtang mangulo usab sa Kyrie Dave ang mga beteranong sila si Alfred Belande, Jason Balabag, ug James Ferraren.
Ang makampiyon adunay P50,000 cash ug tropeyo samtang P30,000 alang sa second place. Makabulsa usab og P20,000 ang third placer ug P10,000 alang sa fourth placer.
Gawas sa basketball, aduna usay motocrossnga ipahigayon sa Nobiyembre 17 diha haduol sa bag-ong natukod nga city hall ug ingon downhill mountain bike challenge.
Nagpadayon usab ang lawn tennis ug ang volleyball alang sa kababayn-an ug kalakin-an.
Ang mga kalihukan maoy tipik sa nagsingabot nga kasaulogan sa kapistahan sa maong dakbayan.
Si vice-mayo Apura maoy nagsilbing over-all chairman nga giayudahan nila ni Victor Ian del Rosario (co-chairman), hon. Laurence King Quijano (vice chairman), commissioner Celedonio Abayata Jr., asst. commissioner Ritchie Emnace ug mga sakop nga sila si Reynaldo Regis, Diomedes ug Amraphil Campugan. (JBM)