7,000 ka trabaho sa Lapu-Lapu

MOABOT sa 7,000 ka mga Oponganon ang gikatakdang makatrabaho sa program ang Tulong Panghanapbuhay sa Ating Disadvantaged/Displaced Workers (Tupad) sa Department of Labor and Employment (Dole).

Ang naasoyng programa gigahinan ni Kongresista Paz Radaza ug moabot sa P20 Milyones pesos ubos sa iyang congressional funds.

Matod sa kongresista nga usa sa matag pamilya ang mahimong makatrabaho sa naasoyng programa sa Dole.

Apan gikinahanglan nga kadtong mga way trabaho ug kadto mga indigent o wala gayuy tarong nga pangita.

Wala usay limit sa edad ang mahimong makapahimus sa naasoyng programa.

Gipaniguro ni Radaza nga wala usay bulok politika ang pagpili sa makapahimus sa naasoyng programa.

Gikatakda silang patrabahoon sud sa 10 ka adlaw ug ipaagi by batch aron matagaan og kahigayonan tanan nga makatrabaho sa naasoyng porograma hangtod sa Diyembre 12.

Pinaagi niini masigurong madawat ang sweldo sa mga makapahimus niini sa wala pay pasko.

Bugtong buhaton sa ganahan makapahimus sa naasoyng programa mao ra gayud ang pagduol sa buhatan sa kapitan sa Barangay ug ingon man sa buhatan sa kongresista mismo pinaagi sa pagdala lang sa mga rekisitos sama sa indigent certificate gikan saa barangay.

Ang nagdawat og P386.00 nga suweldo matag adlaw sa gikatakdang makatrabaho sa naasoyng programa ug kinahhanglan motrabaho sulod usab sa walo ka oras.

Dili hinuon mahimong magbalik-balik ug trabaho ang usa ka benepisyaryo sa higayon nga mahuman ang 10 ka adlaw aron tagaan ug kahigayonan ang tanan.

Sunod tuig lain na usab nga trabaho ang mahimong mapahimuslan sa mga Oponganon sanglit tinuig ang pagpadangat sa naasoyng programa.

“In line sa kang President Duterte to DILG ang pagpanglimpyo so manglimpyo sila sa mga lugar nila to help the barangay unya e-document sad gyud na nato kay before unsay nawng sa lugar unya after nakatrabaho sila unsa nay kuan sa lugar,” matod ni Radaza.

Samtang gipahibawo sa kongresista nga gikatakda usa nga makahimus sa pagtrabaho sa iyang buhatan ug mga barangay ang mga buot makapahimus sa Government Internship Program GIP.

Ang matag indibidwal nga nagpangedaron og 15 ngadto sa 30 anyos matagaan og kahigayonan nga makatrabaho sa barangay o sa buhatan sa kongresista sud sa duha ka buwan o kapin aron mahashas sila sa pagtrabaho sa posisyon sa gobiyerno.

“Sa akong office aduna koy 129 kabuok GIP, they can earn as much as P21,000 for two months,” matod ni Radaza sa Superbalita Cebu.